অসমকে ধৰি দাঁতিকাষৰীয়া ৰাজ্যত এসপ্তাহ ধৰি ধুমুহা-বৃষ্টিপাতৰ সম্ভাৱনা

উত্তৰ পূব বিহাৰ আৰু হিমালয়ৰ উপকণ্ঠ পশ্চিমবংগ সংলগ্ন অঞ্চলৰ ওপৰেৰে বলি থকা এক ঘূৰ্ণীয় প্ৰবাহৰ উপস্থিতিৰ বাবে আগন্তুক এসপ্তাহ ধৰি উত্তৰ-পূৰ্বাঞ্চলত বিজুলী ঢেৰেকনিৰে মজলীয়া ধৰণৰ বৰষুণৰ লগতে ধুমুহা অহাৰ সম্ভাৱনা আছে।

বৰ্তমান অসম, অৰুণাচল প্ৰদেশ, মেঘালয় আৰু নাগালেণ্ডকে ধৰি উত্তৰ-পূৰ্বাঞ্চলৰ ৰাজ্যসমূহত বিগত কেইদিন ধৰি বিজুলী ঢেৰেকনিৰে পাতলীয়া বৰষুণ চলি আছে। তদুপৰি, ‘স্কাইমেট ৱেডাৰ’ৰ বাতৰি অনুসৰি অসমৰ পূব অংশত এক ঘূৰ্ণীয় প্ৰবাহ নিৰৱিচ্ছিন্নভাৱে বলি আছে।

আনহাতে তিব্বতীয় অঞ্চলত এটাৰ পাছত আন এটা পশ্চিমীয় প্ৰবাহ চলি আছে। উত্তৰ-পূৰ্বাঞ্চলত এই সকলোবোৰে বংগোপসাগৰৰ পৰা উত্তৰ-পূৰ্বাঞ্চললৈ গতি কৰি আছে।

এই সকলোবোৰৰ ফলশ্ৰুতিত উত্তৰ–পূৰ্বাঞ্চলৰ অসম, অৰুণাচল প্ৰদেশ, মেঘালয় আৰু নাগালেণ্ডকে ধৰি ৰাজ্যসমূহৰ বিভিন্ন স্থানত বতৰ ডাৱৰীয়া হৈ থকাৰ লগতে বিজুলী ঢেৰেকনিৰে বৰষুণৰ লগতে ধুমুহা অহাৰ সম্ভাৱনা বৃদ্ধি পাইছে।

সপ্তাহটোত বেছিভাগ অঞ্চলতে দিনটোৰ তাপমাত্ৰা ২৭ৰ পৰা ৩০ ডিগ্ৰী চেলছিয়াছৰ মাজত থাকিব বুলিও অনুমান কৰা হৈছে। অৱশ্যে, বতাহ আৰু বৰষুণ চলি থকাৰ বাবে দিনে ৰাতি বতৰৰ উঞ্চতা হ্ৰাস পাই থাকিব বুলি বাতৰিটোত কোৱা হৈছে।