৫০০ গছপুলি ৰোপনেৰে ইউ এছ টি এম ল’লে সেউজকৰণৰ শপত

খানাপাৰাৰ ন-মাইলস্থিত ইউনিভাৰ্ছিতি অৱ ছায়েন্স এণ্ড টেকন’ল’জীয়ে সেউজ চৌহদৰ সংকল্পৰে আজি ইয়াৰ চৌহদত ৫০০ৰো অধিক প্ৰাকৃতিক ঔষধিগুণযুক্ত গছপুলি ৰোপন কৰে। তদুপৰি বিশ্ববিদ্যালয়খনে কাইলৈ বিশ্ব পৰিৱেশ দিৱস উপলক্ষে মেঘালয় চৰকাৰে ১৫ লাখ গছপুলি ৰোপনেৰে গিনিজ বুকত নাম সন্নিবিষ্ট কৰাৰ লক্ষত সহযোগিতা আগবঢ়োৱাৰ সংকল্প লয়।

আজি গছপুলি ৰোপন কাৰ্য্যসূচীত অংশগ্ৰহণ কৰি বিশ্ববিদ্যালয়খনৰ আচাৰ্য্য তথা ই আৰ ডি ফাউণ্ডেস্বনৰ অধ্যক্ষ মহবুবুল হকে কয় যে- অদূৰ ভৱিষ্যতে ইউ এছ টি এমত এখন প্ৰাকৃতিক ঔষধিহগুনযুক্ত গছৰ বাগিছা গঢ়ি তোলা হ’ব য’ত মানুহে পৃথিৱীৰ ভিন্ন প্ৰান্তৰ ঔষধি গছ বিচাৰি পাব।

হকে লগতে কাইলৈ অৰ্থাৎ ৫ জুনত বিশ্ব পৰিৱেশ দিৱসৰ লগত সংগতি ৰাখি মেঘালয় চৰকাৰে ১৫ লাখ গছপুলি ৰোপনেৰে গিনিজ বুকত ৰাজ্যখনৰ নাম সন্নিবিষ্ট কৰিবলৈ গ্ৰহণ কৰা পদক্ষেপৰ শলাগ লয়।