লেতেৰা গোৱালপাৰা চহৰ, প্ৰধান মন্ত্ৰীৰ প্ৰতি এক ইতিকিং : আছু সভাপতি

গোৱালপাৰা চহৰত স্বচ্ছ ভাৰত অভিযান এক প্ৰহসনত পৰিণত হৈছে।

সদৌ অসম ছাত্ৰ সন্থাৰ (আছু) সভাপতি দীপাংক নাথে গোৱালপাৰা চহৰখনত কদৰ্যময় পৰিৱেশ সৃষ্টি হ’বলৈ দিয়া বাবে গোৱালপাৰা পৌৰসভা পৰিষদক তীব্ৰ সমালোচনা কৰে।

সোমবাৰে গোৱালপাৰা চহৰত সাংবাদিকৰ আগত আছুৰ সভাপতি নাথে গোৱালপাৰা চহৰৰ প্ৰতি ৰাজ্য চৰকাৰৰ অৱহেলাক দোষাৰোপ কৰি স্বচ্ছ ভাৰত অভিযানৰ দৰে প্ৰধান মন্ত্ৰী নৰেন্দ্ৰ মোদীয়ে নিজেই আৰম্ভ কৰা ব্যাপক প্ৰচাৰিত এক কাৰ্যসূচীত চৰকাৰৰ তথাকথিত সফলতাৰ সন্দৰ্ভত প্ৰশ্ন কৰে।

‘’যদি ৰাজ্যখনৰ চহৰ এখনত এনেধৰণৰ অৱস্থা হয়, তেতিয়াহ’লে চৰকাৰ আৰু পৌৰসভাৰ অস্তিত্ব ক’ত? এয়া প্ৰধান মন্ত্ৰী আৰু তেওঁৰ স্বচ্ছ ভাৰত অভিযান কাৰ্যসূচীৰ প্ৰতি এক ইতিকিং। মই অসমৰ মুখ্য মন্ত্ৰীক বিনম্ৰভাৱে অনুৰোধ জনাইছো যাতে গোৱালপাৰা পৌৰসভাই সন্মুখীন হোৱা সমস্যাৰ ক্ষেত্ৰত হস্তক্ষেপ কৰে আৰু চাফাই কৰ্মী তথা কৰ্মচাৰীৰ দৰমহা বন্ধ হৈ থকাৰ দৰে সমস্যাবোৰৰ সমাধান কৰে,’’-নাথে কয়।

গোৱালপাৰা পৌৰসভা পৰিষদৰ চাফাই কৰ্মীসকলে তেওঁলোকৰ ১২ মাহ ধৰি বন্ধ হৈ থকা দৰমহা মুকলি কৰি দিয়াৰ দাবীত প্ৰতিবাদ সাৱ্যস্ত কৰি আহিছে যাৰ বাবে চহৰখনৰ পৰিচ্ছন্নতা বাধাগ্ৰস্ত হৈছে। বৰ্তমান চহৰখনৰ য’তে ত’তে জাবৰৰ দ’ম দেখিবলৈ পোৱা যায়।