সম্প্ৰীতিৰ অনন্য নিদৰ্শন : ইছলামধৰ্মী লোকে আগবঢ়ালে শ্ৰীমন্ত শংকৰদেৱ সংঘৰ অধিৱেশনৰ ভাগৱত যাত্ৰাৰ স্থায়ী ৰথ

২০১৮ বৰ্ষৰ ফেব্ৰুৱাৰিত গোলাঘাট জিলাৰ দেৰগাঁৱৰ আহোম পথাৰত অনুষ্ঠিত হৈছিল শ্ৰীমন্ত শংকৰদেৱ সংঘৰ ৮৭ সংখ্যক মূলৰ বাৰ্ষিক অধিৱেশন। অধিবেশনৰ তৃতীয় দিনা ভাগৱত শোভাযাত্ৰাৰ বাবে ব্যৱহাৰ কৰা বাহনখন আগবঢ়াইছিল দেৰগাঁৱৰ এগৰাকী মুছলমান সম্প্ৰদায়ৰ ব্যক্তিয়ে। তেওঁৰ নাম ৰাজুমনি হুছেইন।

হিন্দু-মুছলমানৰ মাজত সম্প্ৰীতিৰ এক অনন্য নিদৰ্শন দাঙি ধৰা সেইগৰাকী ব্যক্তিয়েই এইবাৰ শ্ৰীমন্ত শংকৰদেৱ সংঘৰ মূলৰ অধিবেশনত ভাগৱত শোভাযাত্ৰাৰ বাবে ব্যৱহাৰ কৰিবলগীয়া মূল বাহনখন স্থায়ীভাৱে আগবঢ়োৱাৰ প্ৰতিশ্ৰুতি আগবঢ়াইছে।

দেওবাৰে ৰাজুমনি হুছেইনে গুৱাহাটীৰ ৰূপনগৰস্থিত সংঘৰ কাৰ্য্যালয়লৈ আহি সংঘৰ পদাধিকাৰ কমলাকান্ত গগৈ, প্ৰধান সম্পাদক বাবুল বৰাৰ লগতে কেইবাগৰাকীও বিষয়ববীয়াৰ উপস্থিতিত ভাগৱত যাত্ৰাৰ বাবে স্থায়ী বাহনখন আগবঢ়োৱাৰ প্ৰতিশ্ৰুতি দিয়ে। এইক্ষেত্ৰত কৰিবলগীয়া যাৱতীয় কাম-কাজ কেইদিনমানৰ ভিতৰতেই সম্পন্ন কৰিব বুলিও তেওঁ সংঘক জনোৱা বুলি প্ৰধান সম্পাদক বাবুল বৰাই আমাক জানিবলৈ দিছে।

দেৰগাঁও অধিবেশনত হুছেইনে আগবঢ়োৱা বাহনখনত গড়ুড় পক্ষী সম্বলিত এখন ৰথ হিচাপে সজাই লৈ তাত গুৰু আসন আৰু ভাগৱত প্ৰতিস্থা কৰি শোভাযাত্ৰা কৰা হৈছিল। ৰথখনৰ বাবে বাহনখন আগবঢ়োৱাই নহয় গুৰু আসন আৰু তাত অস্থায়ী মণিকূট সজোৱা আটাইখিনি কামৰ বাবে ৰাজুমনি হুছেইনে খৰচ বহন কৰিছিল বুলি বাবুল বৰাই প্ৰকাশ কৰিছে।

কেৱল দেৰগাঁও অধিবেশনতেই নহয় বিগত মৰিগাঁও অধিবেশনতো তেওঁ আৰ্থিক বৰঙণি আগবঢ়োৱাৰ উপৰি ভাগৱত যাত্ৰাৰ ক্ষেত্ৰতো সহযোগিতা আগবঢ়াইছিল। ইয়াৰ উপৰি তেওঁ মহাপুৰুষ শ্ৰীমন্ত শংকৰদেৱ বিশ্ববিদ্যালয়লৈ এক লাখ টকাৰ অৰিহনা আগবঢ়াইছিল।  ইছলামধৰ্মী ৰাজুমনি হুছেইনৰ উদাৰতা আৰু ধৰ্মীয় সংকীৰ্ণতাৰ বিপৰীতে এনে মহানুভৱতাক শলাগ লৈছে শ্ৰীমন্ত শংকৰদেৱ সংঘৰ বিষয়ববীয়াৰ লগতে বিভিন্ন জনে।