প্ৰতিবছৰে ৭ জুলাইত ‘এ দ্যে ফৰ মাদাৰ আৰ্থ’ হিচাপে পালন কৰাৰ সিদ্ধান্ত ছিকিম চৰকাৰৰ

জলবায়ু পৰিবৰ্তনৰ প্ৰতি লক্ষ্য ৰাখি ছিকিম চৰকাৰে বিভিন্ন ধৰণৰ পৰিবেশ সজাগতামূলক কাৰ্য্যক্ৰমণিকাৰে এটা দিন ধৰিত্ৰীৰ বাবে উৎসৰ্গা কৰাৰ সিদ্ধান্ত গ্ৰহণ কৰিছে।

প্ৰতিবছৰে ৭ জুলাইৰ দিনটো ‘এ দ্যা ফৰ মাদাৰ আৰ্থ’ হিচাপে পালন কৰাৰ সিদ্ধান্ত গ্ৰহণ কৰিছে ছিকিম চৰকাৰে।

দেশজুৰি ১ জুলাইৰ পৰা ৭ জুলাইলৈ পালন কৰিবলগীয়া বন মহোৎসৱৰ অন্তিম দিনটোত ছিকিম চৰকাৰে বিশেষ দিনটো পালন কৰাৰ সিদ্ধান্ত গ্ৰহণ কৰে।

‘মঙলবাৰে গেংটকৰ বন বিভাগৰ সচিবালয়ত অনুষ্ঠিত হোৱা এখন সংবাদমেলত ৰাজ্যখনৰ বন, পৰিবেশ আৰু বন্যপ্ৰাণী ব্যৱস্থাপনা বিভাগৰ মন্ত্ৰী কৰ্মা লোদেয় ভূটীয়াই ছিকিম চৰকাৰে প্ৰতিবছৰে ৭ জুলাইত ‘এ দ্যে ফৰ মাদাৰ আৰ্থ’ হিচাপে পালন কৰাৰ মহান সিদ্ধান্ত গ্ৰহণ কৰে বুলি উল্লেখ কৰে।

জলবায়ু পৰিবৰ্তনৰ ভয়াবহতা সম্বন্ধে জনসাধাৰণক সজাগ কৰি তোলাৰ বাবে চৰকাৰে এটা দিন পৃথিৱীৰ বাবে পৰিবেশ সজাগতামূলক কাৰ্য্যসূচীৰে পালন কৰাৰ সিদ্ধান্ত গ্ৰহণ কৰে বুলি ৰাজ্যিক মন্ত্ৰীগৰাকীয়ে উল্লেখ কৰে।

ভূটীয়াই ৭ জুলাইত ১১ বজাৰ পৰা সাত মিনিটৰ বাবে ৰাজ্যখনত সকলোধৰণৰ যান-বাহনৰ চলাচল বন্ধ থাকিব বুলি মন্তব্য কৰে।

যানবাহনৰ পৰা বায়ুমণ্ডলত কাৰ্বন মনোক্সাইড, কাৰ্বন ডাই অক্সাইড, চালফাৰ, নাইট্ৰজেন আদিৰ দৰে প্ৰদূষিত উপাদানৰ মাত্ৰা বৃদ্ধি পাই যিয়ে গ্ৰীণ হাউছ গেছত ক্ষতিসাধন কৰে আৰু গোলকীয় উষ্ণতা বৃদ্ধি কৰে।

সুস্থ প্ৰাকৃতিক পৰিবেশৰ বাবে ৰাষ্ট্ৰজুৰি এক বিকল্প চিন্তাধাৰাৰ জন্ম দিয়াৰ উদ্দেশ্যে ছিকিম চৰকাৰে এনেধৰণ সিদ্ধান্ত গ্ৰহণ কৰিছে বুলি মন্ত্ৰীগৰাকীয়ে উল্লেখ কৰে।

ভূটীয়াই ছিকিমৰ চালকসকলক এই ক্ষেত্ৰত সহযোগিতা কৰাৰ বাবে আহ্বান জনায়। উক্ত দিনত ৰাজ্যজুৰি ব্যপক হাৰত গছপুলি ৰোপনৰ কাৰ্য্যসূচীও হাতত লোৱা হৈছে বুলি তেওঁ কয়।