গছ কটাক কেন্দ্ৰ কৰি গোৱালপাৰাত উত্তেজনা; পঞ্চায়ত সচিব আৰু সভাপতিৰ বিৰুদ্ধে গৰজি উঠিল ৰাইজ

গোৱালপাৰা জিলাৰ লক্ষীপুৰ আৰক্ষী থানাৰ অন্তৰ্গত ধুমেৰঘাটত এজোপা পুৰণি বট গছ কাটি পেলোৱাক কেন্দ্ৰ কৰি ধুমেৰঘাটত বিগত দুদিন ধৰি উত্তেজনা অব্যাহত আছে।

গুৰিয়াধাপ গাঁও পঞ্চায়ত কাৰ্যালয়ৰ চৌহদত থকা এজোপা পঞ্চাশ বছৰীয়া বট গছ কাটি পেলালে পঞ্চায়তৰ সচিব আৰু সভাপতিয়ে ৷

পঞ্চায়তৰ সচিব আৰু সভাপতিৰ এনে হঠকাৰী সিদ্ধান্তৰ বিৰুদ্ধে জাঙুৰ খাই উঠিছে ৰাইজ। সম্প্ৰতি ৰাইজৰ ৰোষত পৰাৰ ভয়ত বিগত দুদিন ধৰি আত্মগোপন কৰিছে পঞ্চায়তৰ সভাপতি আৰু সচিব গৰাকীয়ে।

উল্লেখযোগ্য যে ধুমেৰঘাট বজাৰত থকা গুৰীয়াধাপ গাঁও পঞ্চায়তত থকা এই গছডাল বছৰটোৰ ভিন্ন সময়ত অহা আলহী চৰাইৰ জীৰণি স্থলো আছিল। এই গছজোপা অঞ্চলটোৰ প্ৰতিজন লোকৰ বাবেও আছিল বহুত মৰমৰ।

বহু বছৰ পুৰণি এই গছজোপা কোনো বিশেষ কাৰণ নোহোৱাকৈ পঞ্চায়ত সচিব আৰু সভাপতিয়ে মিলি কাটি পেলোৱা ঘটনাক সহজ ভাবে ল’ব পৰা নাই ধুমেৰঘাটৰ ৰাইজে। ৰাইজে ইতিমধ্যে বন বিভাগক ঘটনাৰ সন্দৰ্ভত তদন্ত কৰি গুৰীয়াধাপ গাঁও পঞ্চায়ত সচিব আৰু সভাপতিৰ বিৰুদ্ধে ব্যৱস্থা গ্ৰহনৰ দাবী জনাইছে।