পাৰ্লে-জি বিস্কুট নোহোৱা হৈ যাব নেকি! চাকৰি যাবলৈ ওলাইছে পাৰ্লে-জি বিস্কুট বনোৱা ১০,০০০ কৰ্মচাৰীৰ

গাঁৱৰ স্কুললৈ যোৱা ছাত্ৰ-ছাত্ৰী তথা ঘৰত চাহৰ লগত খাবৰ বাবে আজিও শিশুৰ বাবে প্ৰথম পচন্দ পাৰ্লে-জি বিস্কুট।

চহৰতো পাৰ্লে-জি বিস্কুটৰ গ্ৰাহক কম নহয় । কিন্তু পাৰ্লে-জি বিস্কুট নিৰ্মাতা প্ৰতিষ্ঠান পাৰ্লে বৰ্তমান আৰ্থিক সংকটৰ কবলত পৰিছে।

জানিব পৰা মতে, বিক্ৰী হ্ৰাস পোৱাৰ বাবে পাৰ্লে কোম্পানীয়ে ইয়াৰ লগত জড়িত ৮,০০০-১০,০০০ লোকক কামৰ পৰা অব্যাহতি দিয়াৰ সম্ভাৱনা আছে।

ইংৰাজী বাতৰি কাকত ইকোনোমিক টাইমছত প্ৰকাশিত বাতৰি অনুসৰি প্ৰতিষ্ঠানটোৱে প্ৰতি কিলোগ্ৰামত ১০০ টকাতকৈ কম মূল্যৰ বিস্কুটৰ ক্ষেত্ৰত চৰকাৰক জি এছ টি হ্ৰাস কৰাৰ বাবে দাবী জনাইছে।

যদিহে, চৰকাৰে প্ৰতিষ্ঠানটোৰ দাবী মানি নলয় তেতিয়া হ’লে তেওঁলোকে প্ৰতিষ্ঠানটোত কাম কৰি থকা ৮,০০০-১০,০০০ লোকক কামৰ পৰা অব্যাহতি দিবলগীয়া হ’ব পাৰে।

বিক্ৰী হ্ৰাস পোৱা বাবে প্ৰতিষ্ঠানটোৱে বৃহৎ পৰিমাণৰ লোকচানৰ সন্মুখিন হ’বলগীয়াত পৰিছে।

আনহাতে, বজাৰত পাৰ্লে-জি বিস্কুট সাধাৰণতে ৫ টকা অথবা ইয়াতকৈও কম মূল্যত বিক্ৰী হৈ আছে।

আপোনালোকৰ জ্ঞাতাৰ্থে জনাও যে, পাৰ্লে প্ৰ’ডাক্টৰ বিক্ৰী ১০,০০০ কোটি টকাতকৈও অধিক।

সমগ্ৰ দেশৰ দহটা স্থানত প্ৰতিষ্ঠানটোত প্ৰায় ১ লাখ কৰ্মচাৰীয়ে কাম কৰাৰ লগতে প্ৰতিষ্ঠানটোৱে তৃতীয় পক্ষৰ নিৰ্মাতা গোটকো পৰিচালনা কৰে।

প্ৰতিষ্ঠানটোৰ বিক্ৰীৰ আধাতকৈও বেছি অংশ গাঁৱৰ পৰা অহা।

প্ৰকৃত কাৰণ কি?:

মিদিয়া ৰিপোৰ্ট অনুসৰি জি এছ টি জাৰি কৰাৰ পূৰ্বে প্ৰতি কিলোত ১০০ টকাত কৈ কম দামত বিক্ৰী হোৱা বিস্কুটত ১২ শতাংশ টেক্স দিবলগীয়া হৈছিল।

যাৰবাবে, প্ৰতিষ্ঠানটোৱে জি এছ টি লাঘু হোৱাৰ পাছত ইয়াৰ টেক্স ৫ শতাংশলৈ হ্ৰাস পাব বুলি আশা কৰিছিল কিন্তু জি এছ টি লাঘু হোৱাৰ পাছত সকলোবোৰ বিস্কুটত টেক্স ১৮ শতাংশলৈ বৃদ্ধিহে পায়।

টেক্স বৃদ্ধি পোৱাৰ বাবে প্ৰতিষ্ঠানৰ উৎপাদন মূল্য বৃদ্ধি পাই যাৰ বাবে দাম বৃদ্ধি কৰাৰ বাহিৰে প্ৰতিষ্ঠানটোৰ হাতত আৰু অন্য উপায় নাছিল।

আকৌ দাম বৃদ্ধি কৰাৰ বাবে বিস্কুটৰ বিক্ৰী হ্ৰাস পাবলৈ ধৰিছে।