চূড়ান্ত এন আৰ চিক লৈ তীব্ৰ ক্ষোভ এ পি ডব্লিউৰ সভাপতি অভিজিৎ শৰ্মাৰ

শনিবাৰে ৰাষ্ট্ৰীয় নাগৰিক পঞ্জী প্ৰকাশ হোৱাৰৰ পাছতে প্ৰকাশিত এন আৰ চি সম্বন্ধে তীব্ৰ ক্ষোভ ব্যক্ত কৰে আছাম পাব্লিক ৱৰ্কছৰ সভাপতি অভিজিৎ শৰ্মাই।

প্ৰকাশিত এন আৰ চিৰ পৰা মুঠ ১৯,০৬,৬৫৭ গৰাকী লোকৰ নাম বাদ পৰাৰ পাছতে সমগ্ৰ প্ৰক্ৰিয়াটোৰ ওপৰত অসন্তোষ ব্যক্ত কৰে শৰ্মাই।

৪০ বছৰ এন আৰ চিৰ বাবে আন্দোলন কৰাৰ অন্তত আজি মাত্ৰ ১৯ লাখ লোকৰ নাম বাদ পৰিল বুলি উল্লেখ কৰি তেওঁ ৮৫৫ গৰাকী চহিদৰ বলিদান অথলে যোৱা বুলি কয়।

আনহাতে, এন আৰ চিৰ পুনৰীক্ষণৰ বাবে তেওঁলোকে পাঁচবাৰ ন্যায়ালয়ক আবেদন জনোৱাৰ পাছতো যিসকল সংগঠনে তেওঁলোকক চৰকাৰৰ দালাল বুলি সমালোচনা কৰিছিল সেই সংগঠনবোৰকো নাম উল্লেখ নকৰাকৈ সমালোচনা কৰে শৰ্মাই।

ৰাষ্ট্ৰীয় নাগৰিকপঞ্জীৰ ৰাজ্যিক সমন্বয়ক প্ৰতীক হাজেলাৰ বিশ্বাসযোগ্যতাৰ ওপৰতো প্ৰশ্ন উত্থাপন কৰে আছাম পাব্লিক ৱৰ্কছৰ সভাপতিগৰাকীয়ে। বিগত দহ বছৰৰ পৰা প্ৰতীক হাজেলাক বিশ্বাসত ল’ব নালাগে বুলি তেওঁলোকে কৈ অহা বুলি মত প্ৰকাশ কৰে শৰ্মাই।

তদুপৰি, চৰকাৰে এন আৰ চিৰ নামত খৰচ হোৱা ১,৬০০ কোটি টকাৰ হিচাপে ৰাজহুৱাভাৱে দিব লাগিব বুলি দাবী কৰে তেওঁ। এইক্ষেত্ৰত মুখ্য মন্ত্ৰী, দেশৰ ৰাষ্ট্ৰপতিলৈ পত্ৰ লিখিব বুলি মন্তব্য কৰে শৰ্মাই।

অভিজিৎ শৰ্মাই এন আৰ চি উন্নীতকৰণৰ দ্বাৰা বিদেশী চিনাক্ত কৰণ নহয় বাংলাদেশী লোকৰ নাম ভাৰতীয় হিচাপেহে অন্তৰ্ভূক্ত কৰা হ’ল বুলি অভিযোগ কৰে।