গুৱাহাটী ৰে’লৱে ষ্টেশ্যনত ২৯ খনকৈ চুৰি বাইক জব্দ

পূজাৰ বতৰত গুৱাহাটী ৰে’লৱে ষ্টেশ্যনত উঠিছে বাইকৰ উজান। ৰে’লৱে আৰক্ষীয়ে আজি পুৱা প্ৰায় ১১ বজাত এক অভিযান চলাই ৰে’লৱে ষ্টেশ্যনৰ পৰা ২৯ খনকৈ চুৰি বাইক জব্দ কৰিবলৈ সক্ষম হয়।

আৰক্ষীয়ে জব্দ কৰা বাইকসমূহ  দিল্লীৰ পৰা গুৱাহাটীলৈ অনা হৈছিল। বাইকসমূহ দিল্লী, উত্তৰ প্ৰদেশ, মণিপুৰ, বিহাৰ, হাৰিয়ানা, ছত্তিশগৰ আৰু ৰাজস্থানত পঞ্জীয়নকৃত।

ৰে’লৱে আৰক্ষীয়ে জনোৱা মতে ট্ৰেইনৰ পৰা নমাই বাইকসমূহ পাৰ্চেল গুদামত ৰাখি থোৱা অৱস্থাত গোপন এক খবৰৰ ভিত্তিত অভিযান চলাই ৰে’লৱে আৰক্ষীয়ে বাইকসমূহ জব্দ কৰে।

উল্লেখযোগ্য যে ইয়াৰ পূৰ্বে যোৱা ২ অক্টোবৰত গুৱাহাটী ৰে’লৱে ষ্টেশ্যনত ৰে’লৱে আৰক্ষীয়ে ১৩ খনকৈ চুৰি বুলেট জব্দ কৰিবলৈ সক্ষম হৈছিল। জব্দ কৰা বাইকসমূহৰ গৰাকী এতিয়ালৈকে চিনাক্ত কৰিব পৰা নাই ৰেইলৱে আৰক্ষীয়ে।

লগতে পঢ়ক এখন-দুখন নহয়; গুৱাহাটী ৰে’লৱে ষ্টেশ্যনত জব্দ ১৩ খনকৈ চুৰি বুলেট

আনহাতে ২৯ ছেপ্টেম্বৰৰ দিনা তিনিজন ব্যক্তি ক্ৰমে মহম্মদ ৱাহিদূৰ ৰহমান(৩৫), ৱাৰিছ খান(২৩) আৰু মমতাযোৰ ৰহমান(২২)ক ৰে’লৱে আৰক্ষীয়ে গ্ৰেপ্তাৰ কৰিছিল। গ্ৰেপ্তাৰ কৰা তিনিজনৰে ঘৰ নতুন দিল্লীৰ থাউৱেল জিলাত।

যোৱা ২৫ চেপ্টেম্বৰৰ পৰা আজিলৈকে মুঠ ৪৫ খন বাইক জব্দ কৰিবলৈ সক্ষম হৈছে ৰেইলৱে আৰক্ষী। অৱশ্যে এই বাইক চুৰি কাণ্ডৰ মাষ্টাৰ মাইণ্ড বৰ্তমানো আৰক্ষীৰ জালত পৰা নাই।

ৱাৰিছ খানৰ জ্যেষ্ঠ ভাতৃ সুৰজ খান এই বাইক চুৰি চক্ৰৰ মাষ্টাৰ মাইণ্ড বুলি আৰক্ষী সূত্ৰৰ পৰা জানিব পৰা গৈছে।