কৃষ্ণাইত উৎসৱৰ বতৰত ৰাজনৈতিক নেতাৰ পৃষ্ঠপোষকতাত সক্ৰিয় জুৱাৰী চক্ৰ

পোহৰৰ উৎসৱ দীপাৱলীক কেন্দ্ৰ কৰি গোৱালপাৰা জিলাৰ কৃষ্ণাইৰ বিভিন্ন অঞ্চলত জুৱাৰীৰ বিভিন্ন চক্ৰ সক্ৰিয় হৈ উঠাৰ শেহতীয়া তথ্য পোহৰলৈ আহিছে।

জুৱাৰীৰ চক্ৰবোৰে উৎসৱৰ সুযোগ গ্ৰহণ কৰি জুৱা ৰমৰমীয়া বেহা চলাই থকাৰ তথ্য আৰক্ষীৰ দৃষ্টিগোচৰ হৈছে।

নিষিদ্ধ জুৱাৰ চক্ৰটোৱে কৃষ্ণাইৰ পাইকান, ভেল্টাৰঘাটৰ, ৰাবাৰ বাগান, ৰামপুৰ নামপাৰা, খহিধৰা, হোমপাইপ, জিৰা, কৃষ্ণাই সাপ্তাহিক বজাৰ, ধাইগাঁও আদিকে ধৰি বিভিন্ন স্থানত জুৱাৰ চক্ৰ চলাই আছে।

স্থানীয় নাগৰিকে উত্থাপন কৰা অভিযোগ মতে, জুৱা খেলৰ বাবে সম্প্ৰতি অঞ্চলটোৰ সামাজিক পৰেবেশ বিনষ্ট হোৱাৰ উপক্ৰম হৈছে আৰু এই সম্পৰ্কত তেওঁলোকে স্থানীয় আৰক্ষীক জুৱা খেল বন্ধ কৰাৰ বাবে জনোৱাৰ পাছতো কোনোধৰণৰ ব্যৱস্থা গ্ৰহণ নকৰা বুলি উল্লেখ কৰে।

বিশেষ সূত্ৰ মতে, কৃষ্ণাইৰ জুৱা খেলৰ চক্ৰৰ সৈতে এটা বিশেষ ৰাজনৈতিক দলৰ এজন নেতা জড়িত হৈ আছে আৰু সেই নেতাজনে স্থানীয় আৰক্ষীক টকাৰ বলেৰে মেনেজ কৰি দীৰ্ঘদিনৰ পৰা জুৱাৰ চক্ৰ চলাই লাখ লাখ টকাৰ বেহা চলাই আহিছে।

আনহাতে, অঞ্চলটোৰ সচেতন নাগৰিকে স্থানীয় আৰক্ষী আৰু প্ৰশাসনক কঠোৰ পদক্ষেপ গ্ৰহণ কৰি শীঘ্ৰে অঞ্চলটোক জুৱাৰ ঘাটিৰ পৰা মুক্ত কৰাৰ বাবে সংবাদ মাধ্যমৰ জৰিয়তে আহ্বান জনায়।