‘হেলিকপ্টাৰ যাত্ৰা’ৰ সুযোগ শিক্ষাৰ্থীৰ; মণিপুৰৰ শিক্ষা বিভাগৰ অভিনৱ পদক্ষেপ

চৰকাৰী বিদ্যালয় সমূহত অধ্যয়নৰত চতুৰ্থ শ্ৰেণীৰ পৰা অষ্টম শ্ৰেণীৰ ছাত্ৰ-ছাত্ৰীসকলক হেলিকপ্টাৰত উঠাৰ সুযোগ দিয়াৰ পৰিকল্পনা কৰিছে মণিপুৰৰ শিক্ষা বিভাগে।

ৰাজ্যখনৰ শিক্ষা বিভাগৰ এই অভিনৱ পৰিকল্পনাত আৰ্থিকভাৱে সহায়ৰ হাত আগবঢ়াব সমগ্ৰ শিক্ষা ষ্টেট ইমপ্লিমেণ্টিং ছ’চাইটি মণিপুৰে।

মণিপুৰৰ শিক্ষা মন্ত্ৰী থকছম ৰাধ্যেশ্যামৰ উদ্যোগত অহা ১৪ নবেম্বৰ অৰ্থাৎ শিশু দিৱসৰ দিনাৰ পৰাই হেলিকপ্টাৰ যাত্ৰা আৰম্ভ হ’ব।

এই পদক্ষেপে ছাত্ৰ-ছাত্ৰী সকলক ৰাজ্যখনৰ মনোমোহা দৃশ্য আৰু স্থান সমূহ উপভোগৰ লগতে বুজি পোৱাত সহায় কৰিব।

প্ৰতিটো হেলিকপ্টাৰ যাত্ৰা ২০ মিনিটৰ হ’ব।

শিক্ষাৰ্থী সকলে এই হেলিকপ্টাৰ যাত্ৰাৰ সুযোগ গ্ৰহণ কৰিবলৈ হ’লে অঞ্চল ভিত্তিত অনুষ্ঠিত হ’ব লগীয়া এখন প্ৰতিযোগিতাত অংশ ল’ব লাগিব।

প্ৰতিযোগিতাখন নবেম্বৰ মাহৰ ভিতৰতে বিভাগীয় জ’নেল এডুকেশ্যন অফিচাৰে নিজৰ নিজৰ জিলা বা অঞ্চল সমূহত আয়োজন কৰিব।

দুটা শাখাত অনুষ্ঠিত হ’ব প্ৰতিযোগিতাখন। প্ৰথমটো শাখাত চতুৰ্থৰ পৰা পঞ্চম শ্ৰেণী আৰু দ্বিতীয়টো শাখাত থাকিব ষষ্ঠৰ পৰা অষ্টম শ্ৰেণীৰ ছাত্ৰ-ছাত্ৰী।

এই প্ৰতিযোগিতা সমূহৰ পৰা বিজয়ী হোৱা শিক্ষাৰ্থীয়ে হেলিকপ্টাৰ যাত্ৰাৰ সুযোগ লাভ কৰিব।

প্ৰত্যেকটো অঞ্চলতে অনুষ্ঠিত হ’ব লগীয়া এই প্ৰতিযোগিতাখনৰ পৰা প্ৰথম শাখাৰ তিনি গৰাকী শিক্ষাৰ্থী আৰু দ্বিতীয়টো শাখাৰ পাঁচ গৰাকী শিক্ষাৰ্থীকহে বাচনি কৰা হ’ব।

ইফালে হেলিকপ্টাৰ যাত্ৰাৰ সময়ত শিক্ষাৰ্থী সকলৰ সৈতে এজন শিক্ষক আৰু এজন প্ৰতিনিধি লগত থাকিব বুলি জানিবলৈ দিয়ে।

তথ্য সম্পৰ্কিত তথা ৰাজ্যখনৰ সৈতে সম্পৰ্কিত বিষয়বস্তুৰ ওপৰত প্ৰতিযোগিতাখন অনুষ্ঠিত হ’ব।