‘Assamese Online’ ফেইচবুক পেইজ বন্ধ কৰিবলৈ ফেইচবুক কৰ্তৃপক্ষলৈ চিঠি অসম আৰক্ষীৰ

‘‘Assamese Online নামৰ ফেইচবুক পেজটো বন্ধ কৰিবলৈ ফেইচবুক কতৃপক্ষলৈ অসম আৰক্ষীৰ অপৰাধ শাখাই চিঠি লিখিছে’’। বৃহস্পতিবাৰে সংবাদমাধ্যমৰ আগত এই কথা জানিবলৈ দিয়ে মহানগৰ আৰক্ষী আয়ুক্ত দীপক কুমাৰে।

‘Assamese Online নামৰ এটা ফেইচবুক পেইজ আছে। ক্ৰাইম ব্ৰান্সৰ ফালৰ পৰা ফেচবুকলৈ পত্ৰ প্ৰেৰণ কৰা হৈছে এই পেজটো বন্ধ কৰিবৰ বাবে’ দীপক কুমাৰৰ মন্তব্য।

Assamese Online পেইজটো কোনে চলাই আছে সেই বিষয়ে অসম আৰক্ষী অৱগত নহয় বুলিও আৰক্ষী আয়ুক্ত গৰাকীয়ে কয়।

‘কোন কোন লোকে উক্ত পেইজটো চলাই আছে সেয়া ফেইচবুক কৰ্তৃপক্ষই চিনাক্ত কৰিব পাৰিব। ফেইচবুকৰ ইণ্ডিয়াৰ নডেল অফিচাৰৰ সৈতে অসম আৰক্ষীয়ে যোগাযোগ কৰি আছে,’ দীপক কুমাৰে পুনৰ কয়।

আৰক্ষী আয়ুক্ত গৰাকীয়ে উল্লেখ কৰা মতে, পেইজটোত যিধৰণে লিখি থকা হৈছে নিশ্চিতভাৱে তাৰ ফলত শান্তি-সম্প্ৰীতি ভংগ হৈছে।

অসমৰ মানুহ বুধিয়ক আৰু শান্তিপ্ৰিয় হোৱা বাবে এইক্ষেত্ৰত কোনোধৰণৰ প্ৰতিক্ৰিয়া হোৱা নাই বুলিও কুমাৰে কয়।

তাৎপৰ্য্যপূৰ্ণভাৱে, ‘আপত্তিজনক মন্তব্য’ কৰা ফেইচবুক পেইজ সমূহৰ ওপৰত অসম আৰক্ষীয়ে শেন চকু ৰাখিছে।

১৫ টাৰো অধিক ফেইচবুক পেইজৰ ওপৰত অসম আৰক্ষীয়ে চকু ৰাখিছে যিবোৰত শান্তি সম্প্ৰীতি বিনষ্ট হোৱা আপত্তিজনক পোষ্ট কৰা হৈছে। চাইবাৰ দ’মে ভুৱা ফেইচবুক পেইজৰ বিৰুদ্ধে তদন্ত চলাই আছে বুলিও তেওঁ কয়।

তদুপৰি, ৰাজ্যৰ ভিন্ন জিলাত আপত্তিজনক মন্তব্য দিয়া বহু পেইজৰ এডমিনক মাতি আনি এনেধৰণৰ পোষ্ট নিদিবলৈ কোৱা হৈছে আৰু কিছুসংখ্যকে এনেবোৰ পেইজটো ডিলিট কৰিছে বুলি দীপক কুমাৰে কয়।

উল্লেখযোগ্য যে, পেইজটোৱে বৃহস্পতিবাৰে পুৱাৰ ভাগত প্ৰধান মন্ত্ৰী নৰেন্দ্ৰ মোদী আৰু উচ্চতম ন্যায়ালয়ৰ মুখ্য ন্যায়াধীশ ৰঞ্জন গগৈৰ ফটোৰ সৈতে এইদৰে লিখিছিল-

‘‘হেৰৌ, সংখ্যালঘু তুমিও মুখ্য ন্যায়াধীশ হোৱা,
তুমিও প্ৰধানমন্ত্ৰী হোৱা, তুমিও আই এ এছ,
আই পি এছ , আই আৰ এছ, আই এফ এছ,
তুমি ন্যায়াধীশ হোৱা, উকীল হোৱা আৰু
দেশৰ ভাগ্য তোমাৰ নিজৰ মতেই সলনি
কৰা। আজি যি সকলৰ দপদপনি সকলোতে তেওঁলোকৰ স্থানত তোমালোকে শিক্ষিত হৈ
কিয় নোৱাৰিবা?’’

ইয়াৰোপৰি পেইজটোৱে উচ্চতম ন্যায়ালয়ে অযোধ্যা বিবাদক লৈ দিয়া ঐতিহাসিক ৰায়ৰ পাছতে প্ৰধান মন্ত্ৰী নৰেন্দ্ৰ মোদী আৰু উচ্চতম ন্যায়ালয়ৰ মুখ্য ন্যায়াধীশ ৰঞ্জন গগৈৰ ফটোৰ সৈতে এনেদৰে লিখিছিল-

‘‘আজিৰ ৰায়ৰ দ্বাৰা সংখ্যাগৰিষ্ঠক

সন্তুষ্ট কৰা হ’ল নেকি?

আগন্তুক নিৰ্বাচনত আজিৰ সাফল্যক
হিন্দুৰ জয় বুলি বিজেপিয়ে ঢাক ঢোল
বজাব নেকি?’’