দ্বিতীয় আটোৱাৰ ৰহমান সোঁৱৰণি ফুটবল টুৰ্ণামেণ্ট; প্ৰথম মেচত বিজনী ফেৰেংগা এফ চি বিজয়

২০১২ চনৰ গোষ্ঠী সংঘৰ্ষত প্ৰাণ হেৰুৱা ফকিৰাগ্ৰাম অঞ্চলৰ প্ৰয়াত আটোৱাৰ ৰহমানৰ স্মৃতিত বিগত বৰ্ষৰ দৰে ফকিৰাগ্ৰাম ডি কে ক্লাবে এইবাৰো অনুষ্ঠিত কৰিছে দ্বিতীয় ‘আটোৱাৰ ৰহমান সোঁৱৰণি ফুটবল টুৰ্ণামেণ্ট’।

কোকৰাঝাৰ জিলাৰ অন্তৰ্গত ফকিৰাগ্ৰাম কালঝাৰ প্ৰাথমিক বিদ্যালয় খেলপথাৰত আজিৰ পৰা আৰম্ভ হোৱা এই প্ৰতিযোগিতা সদৌ অসম ছাত্ৰ সন্থাৰ যুটীয়া সম্পাদক নৱ জ্যোতি ৰায়ৰ উপস্থিতিত জিলা আৰক্ষী অধীক্ষক ৰাজেন সিঙে উদ্ধোধন কৰে।

আৰম্ভণিৰ প্ৰতিযোগিতা চিৰাঙৰ বিজনী ফেৰেংগা এফ চি আৰু গোসাইগাঁও জাৰাগুৰী এফ চিৰ মাজত অনুষ্ঠিত হয়।

খেলখনত ফেৰেংগা এফ চিয়ে জাৰাগুৰি এফ চিক ৫-১ গ’লত পৰাস্ত কৰি দ্বিতীয় ৰাউণ্ডত প্ৰবেশ কৰে। দলটোৰ হৈ বিনেন সিঙে ৯.৪০ মিনিটত প্ৰথমটো আৰু সুকুৰসিং বসুমতাৰীয়ে ২২ মিনিটত দ্বিতীয়টো গ’ল দিয়ে।

উল্লেখযোগ্য যে এই ফুটবল টুৰ্ণামেনত অসমৰ বিভিন্ন প্ৰান্তৰ পৰা মুঠ ৮টা ফুটবল দলে অংশগ্ৰহণ কৰিছে। প্ৰতিযোগিতাৰ বিজয়ী দলক ৫১ হেজাৰ টকাসহ ট্ৰফি আৰু ৰানাৰ্চ আপ দলক ৩১ হেজাৰ টকাসহ ট্ৰফিৰে পুৰস্কৃত কৰা হ’ব।

বি টি এ ডি অঞ্চলৰ নৱ প্ৰজন্মক ফুটবলৰ প্ৰতি আকৰ্ষিত কৰাৰ লক্ষ্যৰে ভৱিষ্যতেও এই প্ৰতিযোগিতা অনুষ্ঠিত কৰি যোৱা হ’ব বুলি জনাই প্ৰতিযোগিতাখনৰ উদযাপন সমিতিৰ সভাপতি ৰেজাউল কৰিমে।