কা’ ৰ বিৰুদ্ধে সবল স্থিতি অসম গণ পৰিষদৰ ভাতৃ সংগঠনৰ; শিৱসাগৰত অগপত গৰাখহনীয়া

আজি শিৱসাগৰ প্ৰেছ ক্লাৱত অনুষ্ঠিত হোৱা এক সংবাদ মেলত অসম যুৱ পৰিষদৰ শিৱসাগৰ জিলা সমিতি,সমষ্টি সমিতি আৰু অসম ছাত্ৰ পৰিষদৰ কেন্দ্ৰীয় সমিতিৰ পৰা সকলো সদস্য আৰু কাৰ্যনিবাহক সদস্যই সমূহীয়াভাৱে পদত্যাগ কৰে।

যুৱ পৰিষদৰ শিৱসাগৰ জিলা সমিতিৰ সম্পাদক পৰীক্ষিত বৰুৱাৰ নেতৃত্বত প্ৰায়  তিনি শতাধিক সদস্যই পদত্যাগ কৰে।

জাতীয় স্বাৰ্থত অগপই সবল স্থিতি লব নোৱাৰা বাবে এই সমূহীয়া পদত্যাগ কৰে বুলি তেওঁলোকে জানিবলৈ দিয়ে।

কা’ ৰ বিৰোধিতাৰে অতুল বৰালৈ প্ৰেৰণ কৰা মুকলি চিঠিৰ প্ৰত্যুত্তৰ নিদিয়াৰ বাবে অসমীয়াৰ স্বাৰ্থত অসমীয়াৰ কাষত থিয় দিয়াৰ বাবে এই সিদ্ধান্ত লবলৈ বাধ্য হোৱা বুলি জানিবলৈ দিয়ে যুৱ পৰিষদৰ শিৱসাগৰ জিলা সমিতিৰ সম্পাদক পৰিক্ষিত বৰুৱাই।

তেওঁ লগতে কয়, ‘’আমাক পদত্যাগ নকৰিবলৈ জিলা সমিতিৰ কেইজনমান বিষয়ববীয়াই অহৰহ হেঁচা প্ৰদান কৰি আহিছে। কিন্তু অগপৰ নেতৃত্বৰ ওপৰত আস্থা হেৰুৱাই পেলাই এই সিদ্ধান্ত গ্ৰহণ কৰিছো।‘’

আনহাতে,ৰাজ্য সভাৰ সাংসদ বীৰেন্দ্ৰ প্ৰসাদ বৈশ্যই কা’ ৰ সমৰ্থনত ৰাজ্যসভাত ভোট দি অসমীয়াক অপমান কৰিলে।

শেহতীয়াকৈ কা’ ৰ বিৰুদ্ধে অগপ নেতৃত্বই উচ্চতম ন্যায়ালয়লৈ যোৱাটো ভেকোভাওনা আৰু এয়া অসমীয়াক মূৰ্খ সজোৱাৰ পদক্ষেপ বুলি মন্তব্য কৰে।

ভৱিষ্যতে অসমৰ ৰাজনৈতিক ক্ষেত্ৰত আঞ্চলিক দল গঠন হ’লে সেই দলত যোগদান কৰিব পদত্যাগ কৰা সকলোৱে।