“অগপৰ বলিয়া হাতীটোক লৰচৰ কৰিব নোৱৰাকৈ বান্ধি ৰাখিব লাগিব”, মাৰ্ঘেৰিটাত ক’লে আছুৱে

অসমৰ মুখ্য মন্ত্ৰী সৰ্বানন্দ সোণোৱালৰ লগতে প্ৰতাৰক বিজেপি চৰকাৰক অসমৰ ৰাইজে আগন্তুক নিৰ্বাচনত প্ৰত্যাখ্যান কৰিব লাগে বুলি মন্তব্য কৰিছে আছুৰ নেতৃত্বই।

আজি আছুৰ উদ্যোগত মাৰ্ঘেৰিটা টাউন হাইস্কুল খেলপথাৰত CAA-বিৰোধী প্ৰতিবাদ কৰিবলৈ ‘মাৰ্ঘেৰিটা গৰ্জন’ কাৰ্য্যসূচী অনুষ্ঠিত হয়।

কাৰ্য্যসূচীৰ আৰম্ভণিতে বিতৰ্কিত আইনখনৰ বিৰুদ্ধে গণতান্ত্ৰিক প্ৰতিবাদ কৰিবলৈ গৈ অসমৰ বিভিন্ন ঠাইত চহিদ হোৱা ৫জন চহিদক শ্ৰদ্ধাঞ্জলি জনায় উপস্থিত আছু নেতা আৰু ৰাইজে।

প্ৰতিবাদী কাৰ্য্যসূচীটোত মূৰত গামোচা লৈ হাজাৰ হাজাৰ মহিলাই অংশগ্ৰহণ কৰে।

প্ৰতিবাদকাৰীয়ে নেগেৰা নাম, দিহা নাম, গায়ন-বায়নৰ উপৰি প্ৰতিবাদী গীত-মাতক ব্যৱহাৰ কৰে প্ৰতিবাদ সাব্যস্তৰ উপায় হিচাপে । বহুকেইজন শিল্পীয়েও ভাগ লয় কাৰ্য্যসূচীটোত।

জাতিধ্বংসী হিচাপে ৰাইজে চিহ্নিত কৰা আইনখনক সমৰ্থন জনোৱা বিজেপিৰ মিত্ৰ অগপকো কটাক্ষ কৰে কাৰ্য্যসূচীটোত উপস্থিত থকা আছুৰ নেতৃত্বই।

সংগঠনটোৰ কেন্দ্ৰীয় কাৰ্য্যনিৰ্বাহক উদ্দীপজ্যোতি গগৈয়ে কয়, “বৰ্তমান পগলা হাতীৰ ৰূপ লোৱা অগপৰ বলিয়া হাতীটোক লৰচৰ কৰিব নোৱৰাকৈ বান্ধি ৰাখিবৰ লাগিব”।

কেন্দ্ৰীয় কাৰ্য্যনিৰ্বাহক সদস্যজনে আছুৰ নতুন ৰাজনৈতিক দল গঠন সম্পৰ্কে বিভিন্ন পৰ্য্যায়ত আলোচনা চলি আছে বুলিও মন্তব্য কৰে।

তেওঁ আৰ এছ এছ আৰু দিল্লীৰ পদলেহনকাৰী বিজেপি নেতা-কৰ্মীসকলক ৰাইজৰ পক্ষত থিয় হৈ খিলঞ্জীয়াৰ পৰিচয় দাঙি ধৰিবলৈ আহ্বান জনায়।

মাৰ্ঘেৰিটা আঞ্চলিক ছাত্ৰ সন্থাৰ সভাপতি চিন্তু গগৈ আৰু ভাৰপ্ৰাপ্ত সম্পাদক ৰুপম বৰুৱাই নেতৃত্ব লোৱা মাৰ্ঘেৰিটা গৰ্জন শীৰ্ষক এই প্ৰতিবাদী কাৰ্য্যসূচীটোত আঞ্চলিকতাবাদী নেতা দেৱজিৎ বৰুৱাও উপস্থিত থাকে।

মাৰ্ঘেৰিটাৰ শিল্পী সমাজ, অসম জাতীয়তাবাদী যুৱ ছাত্ৰ পৰিষদ, সদৌ অসম গোৰ্খা ছাত্ৰ সন্থা, ভোজপুৰী পৰিষদ আদি বিভিন্ন জাতীয়, জনগোষ্ঠীয় দল-সংগঠনেও সহযোগ আগ বঢ়ায় এই প্ৰতিবাদী কাৰ্য্যসূচীলৈ।