গুৱাহাটী স্মাৰ্ট চিটি প্ৰকল্প আৰু ৰাজ্য চৰকাৰৰ ভেকোভাওনা

প্ৰধান মন্ত্ৰী নৰেন্দ্ৰ মোদী নেতৃত্বাধীন কেন্দ্ৰীয় চৰকাৰে  ২০১৫ চনতে গুৱাহাটীক স্মাৰ্ট চিটি হিচাপে গঢ়ি তোলাৰ পৰিকল্পনা গ্ৰহণ কৰিছিল যদিও ৰাজ্য চৰকাৰ আৰু সংশ্লিষ্ট চৰকাৰী বিভাগ সমূহৰ অৱহেলা আৰু দায়িত্বজ্ঞানহীনতাৰ বাবে স্মাৰ্ট চিটীৰ পৰিকল্পনাই আজিও  বাস্তৱ ৰূপ নাপালে।

গুৱাহাটী স্মাৰ্ট চিটি প্ৰকল্পত  ব্ৰহ্মপুত্ৰ নদী পাৰৰ উন্নয়ন, মৰা ভৰলু, ভৰলু, বৰচলা আৰু দীপৰ বিলৰ সংৰক্ষণ আৰু উন্নয়ন, স্মাৰ্ট লাইটিং, স্মাৰ্ট চিটীবাছ আস্থান নিৰ্মাণ কৰা আদি আঁচনিবোৰ অন্তৰ্ভূক্ত কৰা হৈছিল।

পৰিতাপৰ কথা যে ইয়াৰ এটাও আঁচনিৰ কাম সম্পূৰ্ণ কৰা দূৰৰ কথা আজি পৰ্যন্ত এটা আঁচনিৰো কাম আৰম্ভ নহ’ল ।

উল্লেখযোগ্য যে, আৰম্ভণিতে গ্ৰহণ কৰা আঁচনিকেইটাৰ কাম আৰম্ভ  নকৰাকৈ আঁচনিকেইটা ২ বছৰ পেলাই থোৱাৰ পাছত  স্মাৰ্ট চিটী প্ৰকল্প ৰূপায়নৰ দায়িত্বত থকা গুৱাহাটী স্মাৰ্ট চিটী লিমিটেডে দুবছৰ পিছত আৰু নতুনকৈ কেইটামান আঁচনি গ্ৰহণ কৰে।

নতুনকৈ গ্ৰহণ কৰা আঁচনিকেইটা ক্ৰমে গুৱাহাটীৰ বিভিন্ন স্থানত ৱাটাৰ এ টি এম স্থাপন কৰা, জৈৱিক শৌচাগাৰ নিৰ্মাণ, শৰণীয়া পাহাৰত থকা গান্ধীমণ্ডপৰ সৌন্দৰ্য বৰ্দ্ধনৰ কাম আৰু গান্ধীমণ্ডপত সু-উচ্চ ৰাষ্টীয় পতাকা স্থাপন কৰা।

আৰম্ভনিতে গ্ৰহণ কৰা আঁচনিবোৰৰ কাম পেলাই থৈ নতুনকৈ গ্ৰহণ কৰা আঁচনিকেইটা ক্ৰমে গুৱাহাটীৰ বিভিন্ন স্থানত ৱাটাৰ এ টি এম স্থাপন কৰা, জৈৱিক শৌচাগাৰ নিৰ্মাণ কৰা, শৰনীয়া পাহাৰত থকা গান্ধীমণ্ডমৰ সৌন্দৰ্য বৰ্দ্ধনৰ কাম কৰা আৰু গান্ধীমণ্ডমত সু-উচ্চ ৰাষ্টীয় পতাকা স্থাপন কৰাৰ কাম আৰম্ভ কৰে চৰকাৰে।

মনকৰিবলগীয়া যে,  ব্ৰহ্মপুত্ৰ নদী পাৰৰ উন্নয়ন, মৰা ভৰলু, ভৰলু, বৰচলা আৰু দীপৰ বিলৰ সংৰক্ষণ আৰু উন্নয়ন, স্মাৰ্ট লাইটিং, স্মাৰ্ট চিটীবাছ আস্থান নিৰ্মাণ কৰা¸ আদি আঁচনিবোৰৰ বাবে কেন্দ্ৰীয় আৰু ৰাজ্য চৰকাৰে ২০১৬-১৭ চনতে ১৯১ কোটি টকা আৰু ২০১৭-১৮ চনতে ৫ কোটি কোটি ধনৰ অনুমোদন দিছিল কিন্তু এই আঁচনিকেইটা ফাইলতে আৱদ্ধ হৈ থাকিল।

নিৰ্দিষ্ট ধনৰ অনুমোদনৰ পাছতো আঁচনিকেইখনৰ বিস্তৃত প্ৰকল্প প্ৰতিবেদন চমুকৈ ডি পি আৰ আজিলৈকে প্ৰস্তুত হৈ নুঠিল।

নতুনকৈ গ্ৰহণ কৰা আঁচনিকেইটা ক্ৰমে গুৱাহাটীৰ বিভিন্ন স্থানত ৱাটাৰ এ টি এম স্থাপন কৰাৰ বাবে ২.০৯ কোটি টকা, জৈৱিক শৈাচাগাৰ নিৰ্মাণ কৰাৰ বাবে ৯.৫৩ কোটি টকা,   আৰু  গান্ধীমণ্ডমত সু-উচ্চ ৰাষ্টীয় পতাকা স্থাপন কৰা কামৰ বাবে  চৰকাৰে ২.৯২ কোটি টকা মোকোলাই দিয়া হৈছিল।

গুৱাহাটী স্মাৰ্ট চিটি লিমিটেড চমুকৈ জি এছ চি এলে দিল্লীৰ সজল প্ৰাইভেট লিমিটেড নামৰ এটা বহিৰাগত কোম্পানীৰ জৰিয়তে গুৱাহাটীৰ বিভিন্ন স্থানত প্ৰায় ৩ কোটি টকা ব্যয় কৰি ২০টা পানীৰ এ টি এম স্থাপন কৰিছে যদিও বৰ্তমান এই পানীৰ এ টি এমবোৰ ভালুকৰ সাঙীত পৰিণত হৈছে।

ইপিনে, গুৱাহাটীৰ বিভিন্ন এলেকাত  ৯.৫৩ কোটি টকা ব্যয় সাপেক্ষে নিৰ্মাণ কৰা ৩০ টা  জৈৱিক শৌচাগাৰৰ  ২১টা  জৈৱিক শৌচাগাৰ মুকলি কৰা হৈছে যদিও চোৱাচিতাৰ অভাৱত একাংশ জৈৱিক শৌচাগাৰ ব্যৱহাৰৰ অনুপযোগী হৈ পৰিছে।

আকৌ গান্ধীমণ্ডপত ২.৯২ কোটি টকা ব্যয় কৰি স্থাপন কৰা সু-উচ্চ ৰাষ্টীয় পতাকাখনো কাৰ্যতহে মাজে সময়তে উত্তলোন কৰা হয়। ব্ৰহ্মপুত্ৰ নদী পাৰৰ উন্নয়ন, দীপৰ বিলৰ সংৰক্ষণ আৰু উন্নয়ন আৰু স্মাৰ্ট লাইটিং আঁচনিকেইখন আগতে কৰাৰ সিদ্ধান্ত লৈছে।

যোৱা বিধানসভাৰ অধিবেশনত গুৱাহাটী উন্নয়ন বিভাগৰ মন্ত্ৰী সিদ্ধাৰ্থ ভট্টাচাৰ্যই ব্ৰহ্মপুত্ৰ নদী পাৰৰ উন্নয়ন, বৰচলা বিলৰ  সংৰক্ষণ আৰু উন্নয়ন, স্মাৰ্ট লাইটিং আঁচনিৰ কামৰ প্ৰাককলন প্ৰস্তূত হোৱা বুলি সদৰি কৰিছিল কিন্তু কেতিয়াৰ পৰা এই কাম আৰম্ভ কৰিব আৰু শেষ কৰিব তাৰ কোনো উত্তৰ মন্ত্ৰী সিদ্ধাৰ্থ ভট্টাচাৰ্যই নিদিলে।

বাকী দীপৰ বিল, মৰা ভৰলু,  ভৰলু সংৰক্ষণ আৰু উন্নয়ন আৰু স্মাৰ্ট চিটীবাছ আস্থান নিৰ্মাণ কৰা¸ আদি আঁচনিবোৰ কেতিয়া আৰম্ভ কৰিব সেই বিষয়ে  মন্ত্ৰী ভট্টাচাৰ্যই কোনোধৰণ উল্লেখ নকৰিলে। এনেদৰেই সম্পূৰ্ণ অপৰিকল্পিত আৰু অভিনৱভাবে গুৱাহাটীৰ স্মাৰ্ট চিটিৰ কাম চলি আছে।