৩০ঃ ১৭: বলৱান মহন্তৰ ৭ দিনৰ সময় অতুল বৰাক

অগপ কৰে যদি অগপ কৰক, বিজেপি কৰিলে বিজেপিলৈ যাওক: নাগৰিকত্ব (সংশোধন) আইন ২০১৯ বিৰোধী অসম গণ পৰিষদ নেতা-কৰ্মীক লগত লৈ বলৱান প্ৰফুল্ল কুমাৰ মহন্তৰ মঙলবাৰে স্পষ্ট আহ্বান দলৰ অতুল বৰা-আদি নেতৃত্বক।

মহন্তৰ নেতৃত্বত সমৱেত হোৱাসকলে কা-বিৰোধিতা কৰে আৰু “নেতৃত্ব”ৰ বিৰুদ্ধে দলৰ ৪৭খন জিলা সমিতিৰ ৩০খন এতিয়ালৈকে লগ হৈ, তেওঁলোকৰমতে, “তেওঁলোক” হৈছে।

অগপ মুখ্য কাৰ্য্যালয়ত মঙলবাৰে তলা মাৰি প্ৰৱেশ বন্ধ কৰাৰ পিছত জাঙুৰ খাই উঠা মহন্ত-বৃন্দাবন গোস্বামী-পবীন্দ্ৰ ডেকাসহিত নেতা-কৰ্মীয়ে অসম সাহিত্য সভাৰ সংগীতাচাৰ্য্য লক্ষ্মীৰাম বৰুৱা সদনত কৰা সভাত এই সিদ্ধান্ত লোৱা হয়।

তেজপুৰৰ বিধায়ক, দলৰ প্ৰতিষ্ঠাপক নেতা বৃন্দাবন গোস্বামীয়ে সভাৰ সিদ্ধান্ত ঘোষণা কৰি কয়, কা-ক লৈ নেতৃত্বই ৭ দিনৰ ভিতৰত স্থিতি স্পষ্ট কৰি দিব লাগে, অন্যথা তেওঁলোকে নিজেই পদবোৰ এৰি দিব লাগে।

প্ৰাক্তন সভাপতি গোস্বামীয়ে লগতে ঘোষণা কৰে যে কা-ৰ বিৰুদ্ধে ধাৰাবাহিক আন্দোলনৰ বাবে সভাত সিদ্ধান্ত লোৱা হৈছে।

বিজেপি, অগপ যিকোনো এটা কৰিবলৈ আহ্বান জনাই প্ৰাক্তন মুখ্য মন্ত্ৰী মহন্তই কা-ক লৈ নেতৃত্বক চোকা সমালোচনা কৰে।

“টিভিৰ আগত মই কালি দেখা পালো তেওঁলোকে কৈছে আমি এই আইনৰ বিৰোধিতা কৰিছো। পিছ মুহূৰ্ততে ডিঙিত গামোচা লৈ জাগীৰোডত বিজেপিৰ মিটিং কৰিছেগৈ। এইটো কেনে কথা হ’ব পাৰে?” মহন্তই কয়।

ৰাজ্য সভাত অগপ সাংসদ বীৰেন্দ্ৰ প্ৰসাদ বৈশ্যই কা-ৰ বিৰুদ্ধে বক্তব্য ৰখাৰ পিছত সমৰ্থনত ভোট দি আকৌ বিৰুদ্ধে উচ্চতম ন্যায়ালয়ৰ দ্বাৰস্থ হোৱা প্ৰসংগতো মহন্তই নেতৃত্বক চোকা সমালোচনা কৰে।

“জানি-শুনি কিবা এটা ভুল কৰি যদি আদালতলৈ যায়, তেন্তে তেওঁ শাস্তিও পাব পাৰে। তেনেকুৱা ১১-১২ টা গোচৰ আছে য’ত জৰিমনা, জে’লপৰ্য্যন্ত শাস্তি মূৰ পাতি ল’বলগীয়া হৈছে,” দলৰ চাৰি-পাঁচগৰাকী কা-সমৰ্থকৰ বাবে আমাৰ হাৰাশাস্তি হ’ব নোৱাৰে বুলি উল্লেখ কৰি মহন্তই কয়।

মিত্ৰ চৰকাৰৰ অগপ মন্ত্ৰী ফণীভূষণ চৌধুৰীয়ে মহন্তহঁতক “নেতৃত্ব” নহয় বুলি অভিহিত কৰি দলৰ ক্ষতি হোৱা কাম নকৰিবলৈ আহ্বান জনোৱাৰ বিপৰীতে প্ৰাক্তন মুখ্য মন্ত্ৰীজনে কয় যে তৃণমূল কৰ্মীৰ প্ৰচেষ্টাতহে অসম গণ পৰিষদ শক্তিশালী হ’ব।

“আৰু তেতিয়াহে বিজেপিৰ কবলৰ পৰা অগপ মুক্ত হ’ব পাৰিব। কোনো ৰাষ্ট্ৰীয় দলেই নিবিচাৰে আঞ্চলিক দলবোৰ শক্তিশালী হওক,” মহন্তৰ মত।

“ৰাজনৈতিক চক্ৰান্তত কেইজনমান বিশেষ ব্যক্তিয়ে দিল্লীৰ শৰণাপন্ন হৈ আত্মসমৰ্পণ কৰিছে। তেওঁলোকৰ লগত বাকী অগপ সদস্য মিলিব নোৱাৰে। কেন্দ্ৰীয় চৰকাৰে ভাবিছে অগপ বহি আছে আৰু এটা আঞ্চলিক ৰাজনৈতিক দল হৈয়ো অগপই ইয়াৰ বিৰোধ কৰা নাই।”

আনহাতে মুখ্য কাৰ্য্যালয়ত দলৰ নেতা-কৰ্মীকে প্ৰৱেশ কৰিবলৈ নিদিয়াক লৈ সভাত উপস্থিত সকলো নেতা-কৰ্মী জাঙুৰ খাই উঠে।

“দলৰ কাৰ্য্যালয়লৈ দলৰ বিষয়ববীয়া আৰু কাৰ্য্যকৰ্তা যাবই লাগিব। আজি অগপ নেতৃত্বই অগণতান্ত্ৰিকভাৱে তলা লগাই বন্ধ কৰি থৈছে,” মহন্তই কয়।

অসম গণ পৰিষদৰ কাৰ্য্যালয় ৰাইজৰ বৰঙণিৰে নিৰ্মিত বুলি উল্লেখ কৰি মহন্তই কয় তাৰ নিৰ্মাণত আজিৰ নেতৃত্বৰ কোনো অৱদান নাই।

“আৰক্ষী-সেনা মোতায়েন কৰি সেইটো তলা লগাই বন্ধ কৰি ৰখাটো উচিত নহয়,” মহন্তই কয়।