কাজিৰঙাত বৃদ্ধি পাইছে পৰিভ্ৰমী জলচৰ পক্ষীৰ সংখ্যা; দ্বিতীয় পক্ষী গণনাৰ সফল সামৰণি

কাজিৰঙাত নাগৰিকত্ব সংশোধনী আইনৰ বিৰুদ্ধে চলি থকা আন্দোলনৰ বাবে বিদেশী পৰ্যটকৰ সংখ্যা কমিলেও বিদেশী পৰিভ্ৰমী জলচৰ পক্ষীৰ সংখ্যা কিন্তু কমা নাই। বিপৰীতে বৃদ্ধিহে পাইছে। কাজিৰঙা ৰাষ্ট্ৰীয় উদ্যানত বিগত দুটা দিন ধৰি চলা দ্বিতীয় পক্ষী গণনাত বৃদ্ধি পাইছে পৰিভ্ৰমী জলচৰ পক্ষীৰ সংখ্যা।

কাজিৰঙা ৰাষ্ট্ৰীয় উদ্যানৰ কৰ্তৃপক্ষৰ উদ্যোগত কৰা দ্বিতীয় পক্ষী গণনাত মুঠ ৯৬ টা প্ৰজাতিৰ ১৯,২২৫ টা জলচৰ পক্ষী পোৱা গ’ল। এইবাৰৰ গণনাত ৰাষ্ট্ৰীয় উদ্যানখনৰ মুঠ ২১ খন বিল বা জলাশয়ৰ মুঠ ৯৬ টা স্থানত একেটা সময়তে গণনা চলোৱা হৈছিল।

পক্ষী গণনাত বিভন্ন স্থানৰ পৰা অহা ২২ জন পক্ষী বিশেষজ্ঞই অংশ গ্ৰহণ কৰা উপৰিও বিভিন্ন শিক্ষানুষ্ঠানৰ পৰা অহা মুঠ ৩১ গৰাকী ছাত্ৰ-ছাত্ৰীয়ে স্বেচ্ছা সেৱক হিচাপে অংশ গ্ৰহণ কৰে।

গণনা কালত ৰাষ্ট্ৰীয় উদ্যানখনৰ অগৰাতলি বনাঞ্চলত ৮৫ টা, কহঁৰা বনাঞ্চলত ৫৯ টা, বাগৰি বনাঞ্চলত ৫৮ টা আৰু বুঢ়াপাহাৰ বনাঞ্চলত মুঠ ৪০ টা প্ৰজাতিৰ পক্ষী পোৱা যায়৷ইয়াৰ বিপৰীতে অগৰাতলিত ৯৯২৪ টা, কহঁৰাত ৩১৫১ টা, বাগৰিত ৪৯৫১ টা আৰু বুঢ়াপাহাৰ বনাঞ্চলত ১১৯৯ টা চৰাই গণনাৰ কালত প্ৰত্যক্ষ কৰে গণনাকাৰীয়ে।

এইবাৰৰ গণনাত কেইবাটাও বিৰল প্ৰজাতিৰ পক্ষী পোৱা গৈছে। দ্বিতীয় পক্ষী গণনাৰ এই তথ্য সদৰী কৰে ডি এফ অ’ ৰমেশ কুমাৰ গগৈয়ে। বিষয়া গৰাকীৰ মতে ইতিমধ্যে বেদখল মুক্ত কৰা বান্দৰডুবি নামৰ অঞ্চলটোত ১৯ টা প্ৰজাতিৰ ৩৫০ টা জলচৰ পক্ষী পোৱা হয় ৷ বেদখল মুক্ত হোৱাৰ পাচৰে পৰাই এই অঞ্চলটোলৈ চৰাই অহিবলৈ লোৱা বুলিও তেওঁ মন্তব্য কৰে ৷

উল্লেখযোগ্য যে ২০১৮ চনৰ ১৯ আৰু ২০ ডিচেম্বৰত কাজিৰঙাত প্ৰথমবাৰৰ বাবে জলচৰ পক্ষীৰ গণনা কৰা হৈছিল আৰু এই গণনাৰ সময়ত ৰাষ্ট্ৰীয় উদ্যানখনত জলচৰ পক্ষীৰ ৮০ টা প্ৰজাতিৰ ১০,৪১২ টা পক্ষী জলাহ ভূমিত প্ৰত্যক্ষ কৰাৰ লগতে ভালেমান বিৰল প্ৰজাতিৰ পক্ষীৰ তথ্যও গণনাকাৰী সকলে সংগ্ৰহ কৰিছিল।