বজাৰলৈ আহি আছে ইলেকট্ৰিক ডেলিভাৰী ৰিক্সা; ঘৰতেই পাব অৰ্ডাৰ কৰা সামগ্ৰী (চাওক ভিডিঅ’)

ৰাজপথত ইতিমধ্যে আমি ইলেকট্ৰিক বাছ, ইলেকট্ৰিক গাড়ী বা বাইক দেখিবলৈ পাইছো বা ইয়াৰ কথা জানিব পাৰিছো।

কিন্তু এইবাৰ এমাজনৰ সৌজন্যত বজাৰলৈ আহি আছে ইলেকট্ৰিক ডেলিভাৰী ৰিক্সা। এই ৰিক্সাৰে এতিয়া অৰ্ডাৰ কৰা আপোনাৰ সা-সামগ্ৰী ঘৰত দি থৈ আহিব।

এমাজন ইণ্ডিয়াৰ ফালৰ পৰা সোমবাৰে কোৱা হৈছে যে ভৰততো এই বিশেষ ৰিক্সা চলিব। কাৰ্বনমুক্ত হোৱা বাবে সম্পূৰ্ণ পৰিৱেশ উপযোগী এই গাড়ীখন ইলেকট্ৰিক বেটাৰীৰ সহায়ত চলিব।

কোম্পানীটোৱে পৰিৱেশৰ প্ৰত্যাহ্বানৰ মোকাবিলা কৰিবলৈ গোটেই বিশ্বতে ইলেকট্ৰিক ডেলিভাৰী ৰিক্সা প্ৰচলনৰ বাবে চলোৱা ব্যৱস্থাৰ তালিকাত এইবাৰ ভাৰতো অন্তৰ্ভুক্ত হ’ল।

এমাজনৰ ফালৰ পৰা জানিব দিয়া মতে ২০২৫ চনৰ ভিতৰত কমেও ১০ হাজাৰ এনেকুৱা বাহৰ ভাৰতৰ পথত চলাচল কৰিব যিটো ২০৩০চনৰ ভিতৰত এক লাখ স্পৰ্শ কৰিব।

Hey, India. We’re rolling out our new fleet of electric delivery rickshaws. Fully electric. Zero carbon. #ClimatePledge pic.twitter.com/qFXdZOsY4y

— Jeff Bezos (@JeffBezos) January 20, 2020

এমাজনৰ চিইঅ’ জেফ বেজছে সোমবাৰে টুইট কৰি এই কথা সদৰী কৰিছে। তেওঁ লিখিছে: ‘’সম্পূৰ্ণ ইলেকট্ৰিক, কাৰ্বনমুক্ত এই বাহনৰ যাত্ৰা ভাৰতত আৰম্ভ হ’ল।‘’

তেওঁ ইয়াৰ লগতে এটা ভিডিঅ’ও প’ষ্ট কৰিছে য’ত ইলেকট্ৰিক ডেলিভাৰী ৰিক্সাখন স্পষ্ট ৰূপত দেখা গৈছে।

চলিত বৰ্ষত দেশৰ কেইবাখনো চহৰত এই গাড়ী চলিব বুলি এমাজনৰ তৰফৰ পৰা জানিব দিছে। বাহনসমূহ ভাৰতীয় কোম্পানী এটাই প্ৰস্তুত কৰাৰ কথাও জনোৱা হৈছে।

গ্ৰাহকৰ হাতত যাতে নিৰাপদে আৰু সঠিক সময়ত সামগ্ৰীসমূহ দিব পৰা যায় তাৰ বাবে পথত নমোৱাৰ পূৰ্বেই বাহনখনৰ খুটি নাটি পৰীক্ষা কৰি চোৱা হৈছে।