মোদী, ৰজনীকান্তৰ পাছত এইবাৰ বীয়াৰ গ্ৰীলছৰ বন্য অভিযানৰ সংগী হ’ব অক্ষয় কুমাৰ!

বীয়াৰ গ্ৰীলছৰ বন্য অভিযানত ইতিমধ্যে সংগ দিছিল ভাৰতৰ প্ৰধান মন্ত্ৰী নৰেন্দ্ৰ মোদী আৰু দক্ষিণৰ চলচ্চিত্ৰৰ ছুপাৰষ্টাৰ ৰজনীকান্তে।

এইবাৰ এই অভিযানত বীয়াৰ গ্ৰীলছক সংগ দিবলৈ আগবাঢ়িছে বলীউদৰ জনপ্ৰিয় অভিনেতা অক্ষয় কুমাৰ।

বলীউদত একশ্যন বা ষ্টান্টৰ বাবে অপ্ৰতিদ্বন্দ্বী হিচাপে অক্ষয় কুমাৰক সকলোৱে জানে।

কিন্তু এইবাৰ বীয়াৰ গ্ৰীলছৰ সৈতে অৰণ্যৰ মাজত দু:সাহসিক অভিযানৰ বাবে সাজু হৈছে অভিনেতাগৰাকী। ইতিমধ্যে অক্ষয় ইয়াৰ বাবে যাত্ৰাও কৰিছে।

প্ৰধান মন্ত্ৰী মোদীয়ে জিম কৰবেট নেশ্যনেল পাৰ্কত গ্ৰীলছৰ সৈতে দু:সাহসিক অভিযানত অংশ লৈছিল।

ইপিনে, ৰজনীকান্তে বান্দীপুৰ টাইগাৰ ৰিজাৰ্ভ ফৰেষ্টত গ্ৰীলছৰ সৈতে শ্বুটিং সমাপ্ত কৰিছে।

আনহাতে, অক্ষয় কুমাৰেও বান্দীপুৰ টাইগাৰ ৰিজাৰ্ভ ফৰেষ্টতে গ্ৰীলছৰ সৈতে শ্বুটিং কৰিব। ইয়াৰ বাবে অক্ষয় ইতিমধ্যে মাইশ’ৰত গৈ উপস্থিত হৈছে। ইয়াতেই “মেন ভাৰ্চেছ ৱাইল্ড’ৰ শ্বুটিঙত ব্যস্ত হ’ব অক্ষয়।

কিন্তু অক্ষয় কুমাৰক কিয় বাচি ল’লে বীয়াৰ গ্ৰীলছে? ইয়াৰ পূৰ্বে “খতৰো কা খিলাড়ী’ত অক্ষয়ে বিভিন্ন ষ্টান্ট দেখুৱাইছিল।

এইবাৰ বীয়াৰ গ্ৰীলছৰ “মেন ভাৰ্চেছ ৱাইল্ড’ত আন এক ৰূপত দেখা যাব অক্ষয় কুমাৰক।