পুত্ৰক বাইক চলাবলৈ দি দেউতাকে ভৰিলে ৪২,৫০০ টকাৰ জৰিমনা

নিজৰ নাবালক পুত্ৰক মটৰ চাইকেল চলাবলৈ দি ওড়িশ্যাৰ এজন ব্যক্তিয়ে ভৰিবলগীয়া হ’ল ৪২,৫০০ টকাৰ জৰিমনা।

প্ৰাপ্ত তথ্য মতে ওড়িশ্যাৰ ভদ্ৰক জিলাত যোৱা ৬ ফেব্ৰুৱাৰীত পথ পৰিবহণ কাৰ্য্যালয়ৰ যান-বাহন পৰিদৰ্শক ধনেশ্বৰ নায়কে কামৰ পৰা উভতি আহি থাকোতে কহৰাপোখাৰি অঞ্চলত এখন বাইকত ৩ গৰাকী কিশোৰে হেলমেট নিপিন্ধাকৈ ভুল দিশত বাইক চলাই থকা দেখা পায়।

পিছত বাইকখন ৰখাই ড্ৰাইভিং লাইচেঞ্চ বিচৰাত বিষয়াগৰাকীয়ে আকাশ বেহেৰা নামৰ বাইক চালক গৰাকী নাবালক বুলি জানিব পাৰে। ফলত তেওঁ আকাশৰ পিতৃ নাৰায়ণ বেহেৰাৰ নামত ৪২,৫০০ টকাৰ এখন চালান কাটে।

চালানখনত মূঠতে সাধাৰণ আইন লংঘনৰ বাবে ৫০০ টকা, ড্ৰাইভিং লাইচেঞ্চ নথকাকৈ বাইক চলোৱাৰ বাবে ৫০০০ টকা, ভুল দিশত বাইক চলোৱাৰ বাবে ৫০০০ টকা, দুচকীয়া বাহনত দুগৰাকীতকৈ অধিক আৰোহী উঠাই অনাৰ বাবে ১০০০ টকা, হেলমেট পৰিধান নকৰাৰ বাবে ১০০০ টকা আৰু নাবালকে বাইক চলোৱাৰ বাবে ২৫০০০ টকাৰ জৰিমনা বিহা হয়।