বিদ্যালয়ত মাৰাঠী বাধ্যতামূলক কৰাৰ বাবে বিধানসভাত চৰকাৰৰ বিধেয়ক; অসমত কেতিয়া?

মহাৰাষ্ট্ৰ চৰকাৰে বৃহস্পতিবাৰে ৰাজ্যখনৰ বিদ্যালয়সমূহত মাৰাঠী ভাষা বাধ্যতামূলক কৰাৰ বাবে এখন বিধেয়ক উত্থাপন কৰিব।

বিধানসভাত বুধবাৰে এই কথা ঘোষণা কৰা হৈছে। শিক্ষা মন্ত্ৰী বৰ্ষা গাইকোৱাডে সদনত জানিবলৈ দিয়ে যে আই বি, আই চি এছ ই আৰু চিবিএছই কে ধৰি শৈক্ষিক বোৰ্ডসমূহৰ প্ৰতিনিধিৰ সৈতে আলোচনাৰ পাছত এক বুজাবুজিৰ জৰিয়তে সিদ্ধান্তটো গ্ৰহণ কৰা হৈছে।

প্ৰস্তাৱিত বিধেয়কখনত মাৰাঠী ভাষাক প্ৰথম শ্ৰেণীৰ পৰা দশম শ্ৰেণীলৈকে বাধ্যতামূলক কৰিব বিচৰা হৈছে।

‘’চৰকাৰে লগতে দক্ষিণ ভাৰতৰ বিদ্যালয়সমূহত স্থানীয় ভাষাসমূহ শিকোৱাত কি ধৰণৰ পেটাৰ্ণ অনুসৰণ কৰা হয় সেই বিষয়ে অধ্যয়ন কৰিছে,’’-মন্ত্ৰীগৰাকীয়ে জানিবলৈ দিয়ে।

মন্ত্ৰীগৰাকীৰ এই বিবৃতিত আপত্তি দৰ্শাই শিৱসেনাৰ বিধায়ক ভাস্কৰ যাদৱে এনে ধৰণৰ অধ্যয়নৰ প্ৰয়োজনীয়তাৰ ওপৰত প্ৰশ্ন তোলে।

‘’মন্ত্ৰীয়ে ৰাজ্য চৰকাৰৰ স্থিতি স্পষ্ট কৰা উচিত,’’-তেওঁ কয়।

প্ৰত্যুত্তৰত মন্ত্ৰীগৰাকীয়ে কয় যে তেওঁ ইতিমধ্যে প্ৰকাশ কৰিছে যে ৰাজ্য চৰকাৰ বিদ্যালয়সমূহত মাৰাঠী ভাষা বাধ্যতামূলক কৰিবলৈ বদ্ধ পৰিকৰ।

ইয়াৰ মাজতে বিজেপি বিধায়ক সুধীৰ মুংগানটিৱাৰে দাবী কৰে যে বিধায়িনী প্ৰক্ৰিয়াৰ নিয়মসমূহ সম্পূৰ্ণ মাৰাঠী ভাষাত কাৰ্য প্ৰণালী চলাব পৰাকৈ সলনি কৰিব লাগে।

‘’বৰ্তমান নিয়মত কোৱা আছে যে কাৰ্যপ্ৰণালী মাৰাঠী, ইংৰাজী বা হিন্দীত অনুষ্ঠিত হ’ব পাৰে,’’তেওঁ কয়।

অধ্যক্ষ নানা পাটলে মুংগানটিৱাৰৰ প্ৰশ্নটো বিবেচনা কৰাৰ আশ্বাস দিয়ে।

উল্লেখযোগ্য যে কা আন্দোলনৰ প্ৰবল প্ৰতিবাদৰ সময়ত অসমতো চৰকাৰে অসমীয়া ভাষা বাধ্যতামূলক কৰাৰ প্ৰতিশ্ৰুতি দিছিল।

কিন্তু বিধানসভাত এখন বিধেয়ক আনি বিষয়টো এতিয়াও স্পষ্ট কৰা নাই অসম চৰকাৰে।