ক্ৰিকেটৰ খেলপথাৰ এৰি কৃষি পথাৰত অমিতা-তৰমুজৰ খেতিত ধৰিলে ধোনীয়ে

অতি শীঘ্ৰে ক্ৰিকেটৰ পথাৰত দেখা পোৱা যাব মহেন্দ্ৰ সিং ধোনীক। আই পি এলত চেন্নাই ছুপাৰ কিংছৰ অধিনায়কৰ দায়িত্বত থকা ধোনী অহা ২ মাৰ্চত দলৰ অনুশীলন শিবিৰত যোগ দিব।

কিন্তু ইয়াৰ পূৰ্বে ধোনীৰ এটা বিশেষ ভিডিঅ’ ভাইৰেল হৈছে, যিটোক লৈ এতিয়া সংবাদ মাধ্যমৰ লগতে অনুৰাগীৰ মাজত তীব্ৰ চৰ্চা লাভ কৰিছে।

ফেইচবুক একাউণ্টত শ্বেয়াৰ কৰা এই ভিডিঅ’টোত ভাৰতীয় ক্ৰিকেট দলৰ প্ৰাক্তন অধিনায়কগৰাকীক কিছু ব্যতিক্ৰম ৰূপত দেখা যায়। আচলতে ধোনীয়ে এতিয়া খেতি-বাতি কৰাৰ চিন্তা কৰিছে। ইতিমধ্যে এই সন্দৰ্ভত কাম আৰম্ভও কৰিছে ধোনীয়ে।

৩৮ বছৰীয়া ধোনীয়ে জৈৱিক পদ্ধতিত খেতি কৰিব বুলি জানিবলৈ দিয়ে। বৰ্তমান তেওঁ গৃহচহৰ ৰাঁচীত তৰমুজ আৰু অমিতা খেতি কেনেদৰে কৰে সেয়া শিকাত ব্যস্ত।

https://www.facebook.com/MSDhoni/videos/2628703237257390/

ধোনীয়ে নিজৰ একাউণ্টত ভিডিঅ’টো শ্বেয়াৰ কৰি লিখিছে, ‘ৰাঁচীত যোৱা ২০ দিনত জৈৱিক পদ্ধতিৰে অমিতা আৰু তৰমুজৰ খেতি আৰম্ভ কৰিছো, প্ৰথমবাৰ সেয়ে বহুত উৎসাহী হৈ আছো’।

২ মিনিটৰ ভিডিঅ’টোত খেতি কাৰ্য আৰম্ভ কৰাৰ পূৰ্বে ধোনীক পূজা-অৰ্চনা কৰা পৰিলক্ষিত হয়। ভিডিঅ’টোত তেওঁক ধূপ জ্বলোৱাৰ লগতে নাৰিকল ভঙাও দেখা যায়।

উল্লেখ্য যে বিগত বিশ্বকাপৰ পিছৰে পৰা ক্ৰিকেটৰ পৰা আঁতৰি থকা ধোনীয়ে আই পি এলৰ বাবে অনুশীলন আৰম্ভ কৰিছে। তেওঁ যোৱা মঙলবাৰে ৰাঁচিস্থিত ঝাৰখণ্ড ক্ৰিকেট এছ’চিয়েশ্যনৰ ষ্টেডিয়ামত কিছু সময় অনুশীলন চলোৱা বুলি জানিব পৰা গৈছে।