জুইৰ কিৰণৰে মন্ত্ৰী হিমন্ত বিশ্ব শৰ্মাক অংকন কৰি উলিয়ালে এজন ঠিকাভিত্তিক শিক্ষকে
জুইৰ কিৰণৰে স্বাস্থ্য মন্ত্ৰী ড০ হিমন্ত বিশ্ব শৰ্মাক অংকন কৰি উলিয়ালে তিনিচুকীয়াৰ মাকুমৰ এজন ঠিকাভিত্তিক শিক্ষকে।
একুৰা জ্বলি থকা জুই আৰু তাৰ পৰা ওলোৱা এঙাৰৰে কালি মনজিৎ কাশ্যপ নামৰ ঠিকাভিত্তিক শিক্ষকজনে মন্ত্ৰীগৰাকীৰ প্ৰতিকৃতি অংকন কৰা বুলি আমাৰ সাংবাদিকক তেওঁ জানিবলৈ দিয়ে।
‘কোভিদ-১৯ ৰ এই ভয়াবহ পৰিস্থিতিৰ মাজত তেওঁ যিদৰে ২৪ ঘন্টাই নিজকে জড়িত কৰি ৰাখিছে, সেয়েহে তেওঁৰ প্ৰতি এক সন্মান জনাই তেওঁৰ প্ৰতিকৃতি জ্বলি থকা জুইকুৰাৰে অংকন কৰিছিলো।‘ মনজিতে আমাৰ সাংবাদিকৰ আগত কয়।
দুলীয়াজানৰ অইল ইণ্ডিয়া হায়াৰ চেকেণ্ডৰী বিদ্যালয়ত ঠিকাভিত্তিক শিক্ষক হিচাপে কৰ্মৰত মনজিৎ।
২০১২ চনত এটা পাতিহাঁহৰ কণীত ১৬১৫ গৰাকী বিখ্যাত মনিষীৰ চিত্ৰ অংকন কৰি বিশ্ব অভিলেখ কৰিছিল মনজিতে। তাৰোপৰি এটা চাউলত ৰাষ্ট্ৰীয় সংগীত লিখি তথা এটা চাউলতে গৰাকী মহাত্মা গান্ধীৰ ২৬ টা চিত্ৰ অংকন কৰি বিশ্ব অভিলেখ গঢ়িবলৈ সক্ষম হৈছিল যুৱকজন।
ইয়াৰোপৰি যোৱা বৰ্ষত ১৪ টা চাউলত ১৪ গৰাকী ৰাষ্ট্ৰপতিৰ চিত্ৰ অংকন কৰিছিল মনজিতে।
ইপিনে, মন্ত্ৰীগৰাকীৰ চিত্ৰ অংকন কৰি থকা মুহূৰ্তৰ ভিডিঅ’ টুইটাৰত আপলোড কৰাৰ পাছতে মনজিৎক টুইটাৰযোগে ধন্যবাদ জনায় মন্ত্ৰী হিমন্ত বিশ্ব শৰ্মাই।