দিল্লীৰ বানত মৰ্মান্তিক ঘটনা : ৩ বছৰীয়া সন্তানৰ বুকুত লৈ নলাত উটি গ’ল মাতৃ

ধাৰাসাৰ বৰষুণৰ বাবে বানত ডুবিছে ৰাজধানী দিল্লী। দিল্লীৰ ৰাজপথত এতিয়া পানীৰ তলত।

বানৰ মাজতেই সংঘটিত হৈছে এক মৰ্মান্তিক ঘটনা। দিল্লীত ৩ বছৰীয়া এটি পুত্ৰ সন্তানসহ নলাত উটি গ’ল এগৰাকী মাতৃ।

জানিব পৰা মতে মাতৃগৰাকীৰ বয়স ২২ বছৰ।

ঘটনাৰ পিছত ডুবাৰু আৰু ক্ৰেনৰ সহায়ত দুয়োকে উদ্ধাৰ কৰা হয় যদিও চিকিৎসালয়লৈ নিয়াৰ পথত চিকিৎসকে তেওঁলোকক মৃত বুলি ঘোষণা কৰে।
আৰক্ষীয়ে জনোৱা মতে, নিহত মাতৃগৰাকীৰ নাম মত তনুজা আৰু তেওঁৰ তিনি বছৰীয়া পুত্ৰৰ নাম প্ৰিয়ংশ।

জানিব পৰা মতে, বুধবাৰে নিশা প্ৰায় আঠ বজাত তেওঁলোক গাজীপুৰ অঞ্চলৰ খোডা কলনীৰ সমীপৰ এখন সাপ্তাহিক বজাৰলৈ গৈছিল। কিন্তু বান আৰু বৰষুণৰ বাবে তেওঁলোক পিছল খাই এটা নলাত পৰি যায়।

আনহাতে উত্তৰ দিল্লীৰ চবজী মাণ্ডী অঞ্চলত প্ৰচণ্ড বৰষুণৰ ফলত এটা ঘৰ ভাঙি গুৰুতৰভাৱে আহত হয় এজন ব্যক্তি। তথ্য লাভ কৰাৰ পিছত উদ্ধাৰকাৰী দলে ধ্বংসাৱশেষৰ পৰা ব্যক্তিজনক উদ্ধাৰ কৰি সংকটজনক অৱস্থাত চিকিৎসালয়ত ভৰ্তি কৰে।

লগতে দক্ষিণ-পশ্চিম দিল্লীৰ বসন্ত কুঞ্জ অঞ্চলত দেৱাল ভাঙি এগৰাকী মহিলাও আহত হয় বুলি আৰক্ষীয়ে জানিবলৈ দিয়ে।

উল্লেখ্য যে বুধবাৰে দিল্লীত মাত্ৰ এঘণ্টাত ১০০ মিলিমিটাৰতকৈ অধিক বৰষুণ হয়। বতৰ বিজ্ঞান কাৰ্যালয়ে প্ৰকাশ কৰা অনুসৰি ৰাষ্ট্ৰীয় ফ্লেছ ফ্লাড গাইডেন্স বুলেটিনত দিল্লীক ‘চিন্তনীয় এলেকা’ৰ তালিকাত অন্তৰ্ভুক্ত কৰা হৈছে।