ৰাজ্য চৰকাৰৰ জনসংখ্যা নীতিৰ সৈতে একমত আমছু; ধৰ্মৰ নামত ৰাজনীতিৰে সহজ সৰল লোকক বিপথে পৰিচালনা নকৰিবলৈ সকিয়নী

‘‘ৰাজ্য চৰকাৰৰ জনসংখ্যা নীতিৰ সৈতে আমছু একমত,’’ মঙলবাৰে গুৱাহাটীৰ দিছপুৰস্থিত ৰাজ্যিক কাৰ্য্যালয়ত এখন সংবাদমেলত আমছুৰ উপদেষ্টা আজিজুৰ ৰহমানে এনেদৰে মত প্ৰকাশ কৰে।

“চৰকাৰৰ জনসংখ্যা নীতিৰ লগত আমি একমত। জনসংখ্যা বৃদ্ধি নিয়ন্ত্ৰণ কৰাটো জাতি-ধৰ্ম-বৰ্ণ নিৰ্বিশেষে অত্যন্ত প্ৰয়োজনীয়।চৰকাৰৰ এই নীতিত আমি পূৰ্ণ সহযোগিতা আগবঢ়াম,” আজিজুৰে ৰহমানে কয়।

আনহাতে, ৰাজ্য চৰকাৰৰ জনসংখ্যা নীতিক লৈ বিভিন্ন ৰাজনৈতিক দল, সংগঠনে আকাশ,বতাহ উত্তাল কৰি তুলিছে বুলি উল্লেখ কৰি আজিজুৰে এইক্ষেত্ৰত চৰকাৰৰ নতুন জনসংখ্যা নীতিলৈ একাংশ ৰাজনৈতিক নেতাই সস্তীয়া ৰাজনীতি কৰি থকা পৰিলক্ষিত হৈছে বুলি কয়।

ৰাজনীতি কৰিলে বুলি ধৰ্মৰ নাম লৈ সহজ সৰল লোকক বিপথে পৰিচালিত নকৰিবলৈ আমছুৰ উপদেষ্টাগৰাকীয়ে সকিয়নী দিয়াৰ লগতে সেইসকল নেতাক প্ৰয়োজনত উচিত শিক্ষা দিয়াৰো হুংকাৰ দিয়ে।

“জনজাতীয় অঞ্চল, চৰ চাপৰি আৰু পৰ্বতীয়া অঞ্চলত বৰ্তমানো শিক্ষাৰ পোহৰ পৰা নাই। চৰকাৰে জনসংখ্যা নীতিৰ দৰে কিছুমান নীতিৰে সৰ্বসাধাৰণ অশিক্ষিত লোকক ভয় ভীতি দেখুৱাব নালাগে, ভয় খুৱাই কোনো কামত সফল হ’ব নোৱাৰি। কিন্তু চৰকাৰে উচিত গুণগত শিক্ষাৰে সকলোকে শিক্ষিত কৰিব লাগে,’’ জনসংখ্যা বৃদ্ধিৰ অন্যতম কাৰণ শিক্ষা আৰু দৰিদ্ৰতা বুলি উল্লেখ কৰি আজিজুৰে এনেদৰে সংবাদ মেলত মন্তব্য কৰে।

ৰাজ্য চৰকাৰে কেবিনেটত গ্ৰহণ কৰা ভূমিনীতিকো আমছুৱে আদৰণি জনায় যদিও খিলঞ্জীয়া কোন সেয়া স্পষ্ট কৰিবলৈ চৰকাৰক আহ্বান জনায়।

“আমি কেবিনেটত গ্ৰহণ কৰা ভূমি নীতিক সমৰ্থন কৰিছো। চৰকাৰৰ কিছুমান মুখপাত্ৰই খিলঞ্জীয়া লোককহে মাটি দিব  বুলি কৈছিল কিন্তু খিলঞ্জীয়াৰ সংজ্ঞা এতিয়ালৈকে নিৰ্ধাৰণ কৰা হোৱা নাই, চৰকাৰে ইয়াৰ সংজ্ঞা নিৰ্ধাৰণ কৰক। খিলঞ্জীয়া কোন? চৰকাৰে ইয়াৰ উত্তৰ দিব লাগে। অসমত বাস কৰা জাতি-ধৰ্ম-বৰ্ণ নিৰ্বিশেষে সকলো অসমীয়া লোক যাতে উপকৃত হয় তেনে নীতি হাতত ল’ব লাগে,” আজিজুৰে কয়।