ব্ৰহ্মপুত্ৰত পুনৰ অঘটন! ফেৰিৰ পৰা নদীৰ বুকুলৈ জাঁপ যুৱকৰ; ভিক্ষাৰীক দি গ’ল অন্তিমটো দান

গুৱাহাটীৰ পৰা উত্তৰ পাৰৰ ৰজা দুৱাৰ ঘাটলৈ যোৱা আৰ পি এল বুঢ়াদিয়া নামৰ ফেৰিখনৰ পৰা ব্ৰহ্মপুত্ৰৰ বুকুত হঠাতে এজন যাত্ৰীয়ে জঁপিয়াই দিয়াত চাঞ্চল্যৰ সৃষ্টি হৈছে।

অভ্যন্তৰীণ জল পৰিবহণ বিভাগৰ ফেৰিখনত এই দুৰ্ঘটনাটো ঘটিছে আজি বিয়লি প্ৰায় ৩ বজাত। যাত্ৰীজন ২৫-২৬ বছৰীয়া যুৱক বুলি প্ৰত্যক্ষদৰ্শী সহযাত্ৰীসকলে জানিবলৈ দিছে।

এই পৰ্য্যন্ত নাম-ধাম একো উদ্ধাৰ সম্ভৱ নোহোৱা যুৱকজনক বিচাৰি এতিয়াও অভিযান অব্যাহত ৰখা ৰাজ্যিক দুৰ্য্যোগ সঁহাৰি বাহিনী সফল হ’ব পৰা নাই।

ঘটনাটো সন্দৰ্ভত ফেৰিখনৰ মাষ্টাৰ সোমেশ্বৰ শইকীয়াৰ ভাষ্যৰ ভিত্তিত গুৱাহাটী ৰজা দুৱাৰ ঘাটটোৰ শাখা বিষয়া মুকুল দাসে পাণ্ডুৰ ৰিভাৰ আৰক্ষীক এখন এজাহাৰ দিছে।

একাংশ যাত্ৰীৰ ভাষ্যমতে, যুৱকজনে জাঁপ দিয়াৰ আগতে এজন ভিক্ষাৰীক ১০০ টকা ভিক্ষা দিছিল।

আনহাতে যুৱকজনৰ অন্তিম দান হিচাপে ১০০ টকা ভিক্ষা পোৱা দুৰ্ভগীয়া ভিক্ষাৰীজনে (যিজন এজন অন্যভাৱে সক্ষম লোক) জনায় যে তেওঁ মানুহজনক “দাদা কিবা এটা দিয়ক” বুলি কোৱাৰ লগে লগে ১০০ টকীয়া নোটখন পকেটৰ পৰা উলিয়াই হাতত দিছিল। তাৰ পিছতে পিছলৈ ঘূৰি দুখোজ গৈয়ে ব্ৰহ্মপুত্ৰৰ বুকুলৈ জাঁপ মাৰি দিয়ে।

ভিক্ষাৰীজনৰ ভাষ্যৰ পৰা জানিব পৰা গৈছে, চৰম সিদ্ধান্তটো লোৱাৰ প্ৰাকমুহূৰ্তত যুৱকজনে জীৱনৰ শেষটো চিগাৰেট খাই আছিল।

“মই কিবা এটা খোজাৰ সময়ত মানুহজনে এটা চিগাৰেট হুঁপি আছিল”, ভিক্ষাৰীজনে কয়।

ফেৰিখনৰ কৰ্মচাৰীসকলে তিনিটাকৈ লাইফ জাকেট দলিয়াই তেওঁক উঠি অহাৰ বাবে সহায় কৰিব খুজিছিল। সেই ইচ্ছা তেওঁ নকৰিলে।

“আমি তিনিটা লাইফ জাকেট দলিয়ালো। তেওঁ নধৰিলে। কিছু দূৰ ভাহি যোৱাত আমি জাহাজখন ঘূৰালো। কিন্তু জাহাজখন লাগি ধৰিল।”, ফেৰিখনৰ কৰ্মচাৰী এজনৰ মন্তব্য।