অত্যাৱশকীয় সামগ্ৰীৰ আকাশলংঘী মূল্যবৃদ্ধি নিয়ন্ত্ৰণত ব্যৰ্থ চৰকাৰ : যোগান বিভাগৰ নীতিৰ বিৰুদ্ধে সৰৱ আপ
” সম্প্ৰতি ৰাজ্যত অত্যাৱশ্যকীয় সামগ্ৰীৰ মূল্যবৃদ্ধি, স্মাৰ্ট বৈদ্যুতিক মিটাৰৰ জ্বলা – কলা, পৌৰ কৰ বৃদ্ধি তথা জীৱন দায়িনী ঔষধৰ মূল্যবৃদ্ধিয়ে সৰ্বসাধাৰণ ৰাইজক জ্বলাকলা খুৱাইছে। আকাশলংঘী মূল্যবৃদ্ধি নিয়ন্ত্ৰণৰ বাবে ৰাজ্য চৰকাৰে কোনো পদক্ষেপ গ্ৰহণ কৰা নাই।” আজি নগাঁৱৰ পানীগাঁৱত আম আদমী পাৰ্টিৰ জিলা কাৰ্যালয়ত অনুষ্ঠিত এক সংবাদমেলত এই অভিযোগ উত্থাপন কৰে আপৰ নগাঁও জিলা সমিতিৰ সভাপতি যুগান্তৰ বৰাই।
দলৰ জিলা সভাপতি গৰাকীয়ে কয়- ৰাজ্যখনত এহাতে সাধাৰণ মানুহৰ আৰ্থিক অৱস্থা শোচনীয় হৈ আছে
, আনহাতে মন্ত্ৰী – বিধায়ক সকলৰ সম্পত্তি বৃদ্ধি পাইছে। সাধাৰণ মানুহৰ দুখ দুৰ্গতিৰ খবৰ লবলৈ তেওঁলোকৰ আহৰি নাই ”সংবাদমেলত দলৰ ৰাজ্যিক উপ সভাপতি ৰাজীৱ শইকীয়াই কয় যে কংগ্ৰেছৰ আমোলত মূল্যবৃদ্ধি ৰোধৰ দাবীত পিয়াজৰ মালা পিন্ধি ওলাই অহা বিজেপি নেতা-নেত্ৰী সকল আজি নিৰৱ হৈ আছে। মূল্যবৃদ্ধি নিয়ন্ত্ৰণৰ প্ৰতিশ্ৰুতিৰে ক্ষমতালৈ অহা বিজেপিৰ দিনতে আকাশলংঘী মূল্যবৃদ্ধি হৈছে। ইয়াৰ বিপৰীতে চৰকাৰে কোনো ব্যৱস্থা হাতত লোৱা নাই।
সংবাদমেলত দলৰ ৰাজ্যিক সাধাৰণ সম্পাদক ভিক্টৰ গগৈয়ে কয়-” অনাগত দিনত চৰকাৰৰ জনবিৰোধী নীতিৰ বিৰুদ্ধে আৰু ৰাজ্যবাসীৰ স্বাৰ্থত আম আদমী পাৰ্টিয়ে শক্তিশালী ভূমিকা পালন কৰিব।”