কৃষক বিক্ষোভৰ সমৰ্থনত ২১ মাৰ্চত পঞ্চাৱত ‘কিষাণ মহাসন্মিলন’ আয়োজন আপৰ
তিনি বিতৰ্কিত কৃষি আইনৰ বাতিলৰ দাবীৰে অব্যাহত থকা কৃষক বিদ্ৰোহলৈ ইতিমধ্যে মুকলি সমৰ্থন আগবঢ়াই আহিছে আম আদমি পাৰ্টিয়ে। আনকি আপৰ নেতা তথা দিল্লীৰ মুখ্যমন্ত্ৰী অৰবিন্দ কেজৰিৱালে বিতৰ্কিত তিনি কৃষি আইন কৃষকৰ বাবে মৃত্যুদণ্ড সদৃশ বুলিও অভিহিত কৰিছে।
কেন্দ্ৰ চৰকাৰৰ এই বিতৰ্কিত তিনি কৃষি আইন বাতিলৰ দাবীত আপ-এ ঠায়ে ঠায়ে সংগঠিতৰূপত কাৰ্যসূচীও গ্ৰহণ কৰিছে।
এই কাৰ্যসূচীৰে অংশ হিচাপে আপ-এ অহা ২১ মাৰ্চত পঞ্জাৱত বিতৰ্কিত কৃষি আইন বাতিল আৰু কৃষক বিক্ষোভৰ সমৰ্থনত এক বিশাল ‘কিষাণ মহাসন্মিলন’ আয়োজন কৰিছে।
পঞ্চাৱৰ প্ৰধান বিৰোধী দলৰ স্থানত অধিষ্ঠিত আপৰ পঞ্চাৱ ৰাজ্যিক সমিতিয়ে আয়োজন কৰা এই ‘কিষাণ মহাসন্মিলন’ত আপৰ কেন্দ্ৰীয় আহ্বায়ক তথা দিল্লীৰ মুখ্যমন্ত্ৰী অৰবিন্দ কেজৰিৱালো উপস্থিত থাকিব।
“অব্যাহত থকা কৃষক বিক্ষোভক ভৱিষ্যতে আৰু অধিক শক্তিশালী কৰাৰ বাবে অহা ২১ মাৰ্চত ম’গাৰ বাঘ পুৰাণাত আপ-এ ‘কিষাণ মহাসন্মিলন’ আয়োজন কৰিছে।” আপৰ সাংসদ ভগৱান্ত মানে সংবাদ মাধ্যমৰ আগত কয়।
সাংসদগৰাকীৰ মতে উক্ত ‘কিষাণ মহাসন্মিলন’ত পঞ্চাৱৰ বাহিৰৰ কৃষকেও অংশগ্ৰহণ কৰিব।
ইফালে আপ-এ কৃষক বিক্ষোভৰ সমৰ্থনত অহা ২৮ ফেব্ৰুৱাৰিত উত্তৰ প্ৰদেশৰ মীৰাটত আয়োজন কৰিছে ‘কিষাণ মহাপঞ্চায়ত’। এই ‘কিষাণ মহাপঞ্চায়ত’ত দিল্লী মুখ্যমন্ত্ৰী অৰবিন্দ কেজৰিৱালে উপস্থিত কৃষকসকলক সম্বোধন কৰিব।