মন্ত্ৰী প্ৰমিলা ৰাণী ব্ৰহ্মক সাক্ষাৎ আছু-২৮টা জনগোষ্ঠীয় সংগঠনৰ প্ৰতিনিধিৰ

আজি আছু আৰু এবছুৰ উদ্যোগত ২৮টা জনগোষ্ঠীয় সংগঠনৰ প্ৰতিনিধিয়ে জাতিধ্বংসী নাগৰিকত্ব সংশোধনী বিধেয়কখন বাতিলৰ বাবে স্মাৰকপত্ৰ প্ৰদানৰ উদ্দেশ্যে পূব কোকৰাঝাৰ সমষ্টিৰ বিধায়িকা তথা মন্ত্ৰী প্ৰমিলা ৰাণী ব্ৰহ্মক সাক্ষাৎ কৰে।

জাতিধ্বংসী নাগৰিকত্ব সংশোধনী বিধেয়কে জাতীয় জীৱনৰ প্ৰতি যি অশনি সংকেত কঢ়িয়াই আনিছে তাৰ বিৰুদ্ধে মন্ত্ৰী প্ৰমিলা ৰাণী ব্ৰহ্মক বলিষ্ঠ কণ্ঠৰে মাত মাতি খিলঞ্জীয়াৰ পক্ষত থিয় দিবলৈ সংগঠন কেইটাৰ প্ৰতিনিধিয়ে আহ্বান জনায়।

ইফালে সংগঠন কেইটাৰ প্ৰতিনিধিয়ে মন্ত্ৰী প্ৰমিলা ৰাণী ব্ৰহ্মক স্মাৰকপত্ৰখন প্ৰদান কৰি ৰাজ্যখনৰ সকলো মন্ত্ৰী-বিধায়ককে এই বিধেয়কখনৰ বিৰোধিতা কৰিবলৈ আহ্বান জনায়। ইয়াৰ উপৰি বিধেয়কখনৰ বিৰুদ্ধে মেঘালয় চৰকাৰে গ্ৰহণ কৰা কঠোৰ সিদ্ধান্তৰ দৰে অসম চৰকাৰেও তেনে ধৰণৰ সিদ্ধান্ত ল’ব লাগে বুলি প্ৰতিনিধিসকলে মন্তব্য কৰে।

আনহাতে কেন্দ্ৰীয় চৰকাৰে নাগৰিকত্ব সংশোধনী বিধেয়কৰ জৰিয়তে মূলতঃ হিন্দু বাংলাদেশী লোকক অসমত জাপি দিবলৈ বিচৰা কাৰ্যক ছাত্ৰ সন্থাৰ লগতে ২৮টা জনগোষ্ঠীয় সংগঠনে কোনো পধ্যে মানি নলয় বুলি পুনৰবাৰ সংবাদ মাধ্যমৰ আগত কয়।

উল্লেখযোগ্য যে বিধেয়কখনে অসমৰ খিলঞ্জীয়া লোকৰ অস্তিত্বত আঘাত হানিব বুলি মন্ত্ৰী প্ৰমীলা ব্ৰহ্মই সংগঠন কেইটাৰ প্ৰতিনিধিৰ আগত মন্তব্য কৰে। মুখ্য মন্ত্ৰী সৰ্বানন্দ সোণোৱালে অসমৰ কোনো ক্ষতি হোৱা কাৰ্য নকৰে বুলি আশা প্ৰকাশ কৰাৰ লগতে তেওঁৰ প্ৰতি গভীৰ আস্থা আছে বুলিও কয় মন্ত্ৰী ব্ৰহ্মই।