ৰাজ্যত চলি থকা তীব্ৰ প্ৰতিবাদৰ মাজতে CAB ৰ বিৰুদ্ধে উচ্চতম ন্যায়ালয়ৰ কাষ চাপিল আছু

লোকসভা আৰু ৰাজ্যসভাত নাগৰিকত্ব সংশোধনী বিধেয়ক গৃহীত হোৱাৰ পাছত ৰাজ্য জুৰি চলি থকা তীব্ৰ প্ৰতিবাদৰ মাজতে উচ্চতম ন্যায়ালয়ৰ কাষ চাপিছে সদৌ অসম ছাত্ৰ সন্থা।

১২ ডিচেম্বৰত গুৱাহাটীৰ পৰা বিমান যোগে নতুন দিল্লীত উপস্থিত হৈছে সদৌ অসম ছাত্ৰ সন্থাৰ সভাপতি আৰু সাধাৰণ সম্পাদক ক্ৰমে দিপাংক কুমাৰ নাথ আৰু লুৰিণ জ্যোতি গগৈ।

নতুন দিল্লীত উপস্থিত হৈ আছুৰ সভাপতি-সম্পাদক দ্বয়ে ৰাজপথৰ আন্দোলন আৰু আইনী যুদ্ধ সমান্তৰালভাৱে চলাই যোৱা হ’ব বুলি মন্তব্য কৰে।

১২ ডিচেম্বৰত গুৱাহাটী মহানগৰীত নাগৰিকত্ব সংশোধনী বিধেয়ক বিৰোধী আন্দোলনে গুৰুতৰ ৰূপ ধাৰণ কৰে আৰু আৰক্ষীৰ বৰ্বৰ আক্ৰমণত তিনি গৰাকী প্ৰতিবাদকাৰীৰ মৃত্যু হোৱাৰ লগতে বহু কেইগৰাকী আহত হয়।

সমগ্ৰ অসমত আন্দোলনে তীব্ৰ ৰূপ লোৱাৰ সময়ত অসমত ইন্টাৰনেট সেৱা বন্ধ কৰি দিয়া হৈছে আৰু বহু ঠাইত সান্ধ্য আইন জাৰি কৰা হৈছে।