ভীমা কোৰেগাঁও গোচৰত অভিযুক্ত গৌতম নৱলাখাৰ গৃহবন্দীত্বৰ সময়সীমা বৃদ্ধি উচ্চতম ন্যায়ালয়ৰ

ভীমা-কোৰেগাঁও গোচৰত অভিযুক্ত হৈ চাৰিটাকৈ বছৰ কাৰাগাৰত কটোৱাৰ পিছত উচ্চতম ন্যায়ালয়ৰ হস্তক্ষেপত চিকিৎসাজনিত কাৰণত গৃহবন্দীত্বৰ অনুমতি পোৱা মানৱ অধিকাৰ কৰ্মী গৌতম নৱলাখাৰ গৃহবন্দীত্বৰ সময়সীমা বৃদ্ধি কৰা হৈছে।

মঙলবাৰে উচ্চতম ন্যায়ালয়ে নৱলাখাৰ গৃহবন্দীত্বৰ অন্তৱৰ্তীকালীন আদেশ জানুৱাৰী মাহৰ দ্বিতীয় সপ্তাহলৈকে বৃদ্ধি কৰে। ন্যায়াধীশ কে এম জোচেফ আৰু বি ভি নাগাৰথনাৰ বিচাৰপীঠে মানৱ অধিকাৰ কৰ্মীগৰাকীৰ গৃহবন্দীত্বৰ ম্যাদ বৃদ্ধিৰ নিৰ্দেশ গৃহীত কৰে।

উল্লেখ্য যে ১০ নৱেম্বৰত উচ্চতম ন্যায়ালয়ে নৱলাখাক নিৰ্দিষ্ট চৰ্ত সাপেক্ষে এমাহৰ বাবে গৃহবন্দীত্বৰ অনুমতি দিছিল আৰু ৪৮ ঘণ্টাৰ ভিতৰত এই নিৰ্দেশ কাৰ্যকৰী হ’ব লাগে বুলি উল্লেখ কৰিছিল।

কিন্তু নিৰাপত্তাৰ দোহাই দি তদন্তকাৰী সংস্থাই বাৰে বাৰে নৱলাখাৰ মুক্তি স্থগিত ৰাখিছিল। শুকুৰবাৰে নিয়াই নৱলাখাৰ গৃহবন্দীত্বৰ বিৰোধিতা কৰি উচ্চতম ন্যায়ালয়ত পুনৰ আৰ্জি জনাইছিল।

কিন্তু শীৰ্ষ আদালতে নিয়াৰ এইআবেদন নাকচ কৰিছিল আৰু কৌশলীভাৱে তেওঁৰ মুক্তিত বিলম্ব ঘটোৱা বুলি ভৰ্ৎসনা কৰিছিল। ১৮ নৱেম্বৰত শীৰ্ষ আদালতে গৌতম নৱলাখাৰ গৃহবন্দীত্বৰ আদেশ ২৪ ঘণ্টাৰ ভিতৰত কাৰ্যকৰী কৰাৰ নিৰ্দেশ দিছিল।

উচ্চতম ন্যায়ালয়ে লগতে গৌতম নৱলাখা গৃহবন্দী হৈ থাকিবলগীয়া অট্টালিকাটোত কিছু অতিৰিক্ত নিৰাপত্তা ব্যৱস্থা গ্ৰহণৰ নিৰ্দেশ দিছিল। ন্যায়ালয়ৰ নিৰ্দেশৰ পিছত অৱশেষত ১৯ নৱেম্বৰত তালোজা কেন্দ্ৰীয় কাৰাগাৰৰ পৰা বাহিৰলৈ ওলাইছিল নৱলাখা।

স্মৰ্তব্য যে ২০১৮ চনৰ ভীমা কোৰেগাঁওৰ হিংসাত্মক কাৰ্যত উচতনি যোগোৱাৰ লগতে মাওবাদীৰ সৈতে সম্পৰ্ক ৰক্ষাৰ অভিযোগত ২০২০ চনৰ এপ্ৰিল মাহৰ পৰা কাৰাগাৰত বন্দী হৈ আছে নৱলাখা।