‘পৰীক্ষা’ৰ বাবে শ্ৰেষ্ঠ অভিনেতাৰ বঁটা লাভ আদিল হুছেইনৰ

‘পৰীক্ষা’ নামৰ চলচ্চিত্ৰখনৰ বুচ্চি পাছোৱানৰ চৰিত্ৰত কৰা অভিনয়ৰ বাবে বলীউদৰ বিশিষ্ট অভিনেতা আদিল হুছেইনক বুধবাৰে নিশা ইণ্ডো-জাৰ্মান চলচ্চিত্ৰ সপ্তাহত শ্ৰেষ্ঠ অভিনেতাৰ বঁটাৰে সন্মানিত কৰা হয়।

অভিনেতাগৰাকীয়ে এই বাতৰি তেওঁৰ টুইটাৰ পেজত শ্বেয়াৰ কৰিছে।

‘’পৰীক্ষা’ নামৰ চলচ্চিত্ৰখনৰ বুচ্চি পাছোৱানৰ চৰিত্ৰত কৰা অভিনয়ৰ বাবে বাৰ্লিনত ইণ্ডো-জাৰ্মান চলচ্চিত্ৰ সপ্তাহত যোৱা নিশা শ্ৰেষ্ঠ অভিনেতাৰ বঁটা লাভ কৰি শিহৰিত হৈ পৰিছো। এই স্বীকৃতিৰ বাবে আপোনালোকক ধন্যবাদ,’’-অসমৰ অভিনেতাগৰাকীয়ে টুইট কৰি লিখিছে।

‘’মই এই বঁটা মৰমৰ প্ৰকাশ ঝা আৰু অৱশ্যে গোটেই টীমটোৰ সৈতে শ্বেয়াৰ কৰিলো,’’-তেওঁ লগতে কয়।

অসমৰ গোৱালপাৰাৰ বাসিন্দা আদিল হুছেইনে বহুকেইখন বলীউদ তথা আন্ত:ৰাষ্ট্ৰীয় চলচ্চিত্ৰত অভিনয় কৰিছে।

তেওঁ হোটেল ছেলভেশ্যন আৰু মাজ ৰাতিৰ কেতেকী ছবিৰ বাবে ২০১৭চনত ৰাষ্ট্ৰীয় বঁটা (জুৰীৰ বিশেষ বঁটা) লাভ কৰিছিল।

হুছেইনে ১৯৮৬ চনত অসমীয়া ছবি ‘সংকল্প’ৰে চলচ্চিত্ৰ জগতত ভূমুকি মাৰিছিল।

তেওঁ ইংৰাজী, হিন্দী, অসমীয়া, বাংলা, তামিল, মাৰাঠী, মালয়ালম, নৰৱে তথা ফৰাচী ছবিতো অভিনয় কৰিছে।