হৃদয় বিদাৰক: পাঠশালাত দুই সন্তানক বুকুত বান্ধি ৰে’লৰ আগত জাঁপ দিলে মাতৃয়ে

পাঠশালাত সংঘটিত হৈছে এটা শিহৰণকাৰী ঘটনা।

দুটি সন্তানক বুকুত বান্ধি লৈ আত্মহত্যা কৰিলে এগৰাকী মাতৃয়ে।

বৃহস্পতিবাৰে দিনৰভাগত সংঘটিত  এই ঘটনাই জোকাৰি গৈছে সমগ্ৰ অঞ্চলটোকে।

স্বামীৰ অত্যাচাৰ সহিব নোৱাৰি নিজৰ দুই সন্তানক বুকুত বান্ধি ৰে’লৰ আগত জাঁপ দি আত্মহত্যা কৰা মহিলাগৰাকীৰ নাম মিনুৱাৰা খাতুন।

স্বামী গৃহৰ অকথ্য নিৰ্যাতন সহিব নোৱাৰি মহিলাগৰাকীয়ে  আজি দিনৰ ভাগত দুই সন্তানক লগত লৈ উপস্থিত হয় পাঠশালাৰ ৰে’ল আলিত।

মহিলা গৰাকীৰ ৭ বছৰীয়া কন্যা ৰুকছানা আৰু দুবছৰীয়া  কন্যা হামিম চুলতানাই তেতিয়ালৈকে বুজিব পৰা নাছিল যে কি কাৰণত সিঁহতক তালৈ নিয়া হৈছে।

এটা সময়ত সেই স্থানেৰে দুৰন্ত গতিৰে পাৰ হৈ গৈছিল এখন ৰে’ল। ৰে’ল খন অহাৰ সময়তে দুগৰাকী কন্যাক বুকুত সাৱটি ৰে’লৰ আগত জঁপিয়াই দিছিল মহিলাগৰাকীয়ে।

নিমিষতে দুটি নিষ্পাপ শিশুৰ লগতে মাতৃৰ মৃত্যু ঘটে।

এই মৰ্মান্তিক ঘটনাৰ খবৰ বনজুইৰ দৰে বিয়পি পৰাৰ লগে লগে ঘটনাস্থলীত উপস্থিত হয়  জি আৰ পিৰ দল।

জি আৰ পিয়ে মাতৃৰ লগতে দুই কন্যা সন্তানৰ মৃতদেহ উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰিছে।

মহিলাগৰাকীৰ আত্নীয়ই কৰা অভিযোগ অনুসৰি মহিলা গৰাকীয়ে স্বামী হানিফ আলীৰ  অত্যাচাৰ সহিব নোৱাৰিয়েই এনে চূড়ান্ত সিদ্ধান্ত গ্ৰহণ কৰিবলৈ বাধ্য হৈছে।

জানিব পৰা মতে হানিফ আলী পেছাত এজন গাড়ী চালক আৰু তেওঁ নিতৌ পত্নী মিনুৱাৰাৰ ওপৰত চলাই গৈছিল শাৰীৰিক তথা মানসিক নিৰ্যাতন।

স্থানীয় ৰাইজে স্বামী হানিফ আলিৰ উপযুক্ত শাস্তিৰ দাবী উত্থাপন কৰিছে।