মানৱীয় কৰ্তব্য: প্ৰসূতিৰ জীৱন ৰক্ষাৰ্থে নিজেই তেজ দিবলৈ আগবাঢ়ি আহিল চিকিৎসক; সামাজিক মাধ্যমত প্ৰশংসাৰ জোৱাৰ

কোৱা হয়, চিকিৎসকসকল ৰোগীৰ বাবে ঈশ্বৰৰ দূত। ভুৱনেশ্বৰস্থিত এইমছৰ চিকিৎসক ডাক্তৰ দেৱাশীষ মিশ্ৰই প্ৰমাণ কৰি দেখুৱালে প্ৰচলিত এই কথাষাৰৰ শুদ্ধতা। এগৰাকী গৰ্ভৱতী মহিলাক ৰক্তদান কৰি সকলোৰে প্ৰশংসা লাভ কৰিছে এই চিকিৎসক গৰাকীয়ে।

এইমছ ভুৱনেশ্বৰত চিকিৎসাধীন হৈ থকা এগৰাকী গৰ্ভৱতী মহিলাক জৰুৰীকালীনভাৱে প্ৰয়োজন হয় বি নেগেটিভ তেজৰ। সাধাৰণতেই বি নেগেটিভ তেজ অতি বিৰল। মহিলাগৰাকীৰ অৱস্থা ইমানেই অৱনতি ঘটে যে তেজৰ যোগান অবিহনে মহিলাগৰাকীৰ জীৱন ৰক্ষা কঠিন হৈ পৰে।

চিকিৎসালয়খনত কৰ্তব্যৰত ডাক্তৰ দেবাশীষ মিশ্ৰই এই কথা জানিব পাৰে। পলম নকৰাকৈয়ে দেৱাশীষ মিশ্ৰই নিজেই ৰক্তদান কৰাৰ সিদ্ধান্ত লয় আৰু মুহূৰ্তত ৰক্তদান কৰে। দেৱাশীষৰ এই সিদ্ধান্তই ৰক্ষা কৰে মহিলাগৰাকীৰ জীৱন।

এইমছ ভুৱনেশ্বৰৰ কাৰ্যবাহী সঞ্চালক চিকিৎসক তথা অধ্যাপক আশুতোষ বিশ্বাসে এই সন্দৰ্ভত কয় যে এগৰাকী চিকিৎসকৰ কৰ্তব্য হ’ল ৰোগীক সুস্থ কৰি তোলা।

“অৱশ্যে এই ঘটনাই প্ৰমাণ কৰিলে যে দেৱাশীষ এগৰাকী ভাল ডাক্তৰেই নহয়, এগৰাকী ভাল মানুহো। মহিলাগৰাকী এতিয়া একেবাৰে সুস্থ। দেওবাৰে তেওঁক চিকিৎসালয়ৰ পৰা মুকলি কৰি দিয়া হয়।”- বিশ্বাসে লগতে কয়।

চিকিৎসক দেৱাশীষ মিশ্ৰৰ এই কাৰ্যৰ বিষয়ে প্ৰকাশ পোৱাৰ পিছতে তেওঁৰ প্ৰশংসাত পঞ্চমুখ হৈ পৰিছে সকলো লোক। সামাজিক মাধ্যমত চিকিৎসক গৰাকীক প্ৰশংসাৰে উপচাই পেলাইছে সকলোৱে।