মাজ আকাশত ৩০০ ফুট তললৈ নামিল এয়াৰ ইণ্ডিয়াৰ বিমান, তীব্ৰ টাৰ্বুলেন্সত আহত ১২ গৰাকী যাত্ৰী

থাইলেণ্ডৰ ফুকেটৰ পৰা দিল্লীলৈ আহি থকা এয়াৰ ইণ্ডিয়াৰ এখন যাত্ৰীবাহী বিমানে মঙলবাৰে আকাশপথত তীব্ৰ টাৰ্বুলেন্সৰ সন্মুখীন হয়। এই সময়ত বিমানখন হঠাতে প্ৰায় ৩০০ ফুট তললৈ নামি যোৱাত যাত্ৰী আৰু কেবিন ক্ৰুৰ মাজত আতংকৰ সৃষ্টি হয়। এই ঘটনাত ১২ জন যাত্ৰী আঘাতপ্ৰাপ্ত হোৱা বুলি জানিব পৰা গৈছে। অৱশ্যে বিমানখন পিছত নিৰাপদে দিল্লীৰ ইন্দিৰা গান্ধী আন্তঃৰাষ্ট্ৰীয় বিমানবন্দৰত অৱতৰণ কৰে।

এয়াৰ ইণ্ডিয়াই জনোৱা অনুসৰি, AI2379 নম্বৰৰ বিমানখন ৪ আগষ্টৰ পুৱা থাইলেণ্ডৰ ফুকেটৰ পৰা দিল্লীৰ উদ্দেশ্যে উৰা মাৰে। ক্ৰুজিং উচ্চতাত উপনীত হোৱাৰ কিছু সময় পিছতে বিমানখন আচমকাকৈ তীব্ৰ টাৰ্বুলেন্সৰ কবলত পৰে। সেই সময়তে কিছু সময়ৰ বাবে বিমানখনৰ উচ্চতা প্ৰায় ৩০০ ফুট হ্ৰাস পায়।

ফ্লাইট ট্ৰেকিং ৱেবছাইট ফ্লাইটৰাডাৰৰ তথ্য অনুসৰি, বিমানখনৰ এই হঠাৎ উচ্চতা হ্ৰাসৰ সম্ভাৱ্য কাৰণ আছিল প্ৰবল টাৰ্বুলেন্স অথবা শক্তিশালী আপড্ৰাফ্ট আৰু ডাউনড্ৰাফ্ট। স্থানীয় সময় অনুসৰি পুৱা ৮:২৫ বজাত ফুকেটৰ পৰা উৰা মৰা বিমানখন ভাৰতীয় সময় অনুসৰি ১১:৫০ বজাত দিল্লীত উপস্থিত হয়। অৱতৰণৰ পিছত সকলো যাত্ৰী আৰু বিমানকৰ্মী নিৰাপদে বিমানৰ পৰা নামি আহে।

এয়াৰ ইণ্ডিয়াই দাবী কৰিছে যে ঘটনাটোত কোনো লোক গুৰুতৰভাৱে আঘাতপ্ৰাপ্ত হোৱা নাই। যদিও কেইবাজনো যাত্ৰী আৰু কেবিন ক্ৰুৱে সৰু-সুৰা আঘাত পোৱাত তেওঁলোকক বিমানবন্দৰৰ চিকিৎসা কেন্দ্ৰলৈ নিয়া হয়। সংস্থাটোৰ চিকিৎসক দলে তেওঁলোকৰ স্বাস্থ্য পৰীক্ষা কৰি প্ৰয়োজনীয় চিকিৎসাৰ ব্যৱস্থা কৰে।

অৱশ্যে দিল্লী বিমানবন্দৰৰ পৰা প্ৰকাশ পোৱা কেইবাটাও ভিডিঅ’ত আহতসকলৰ অৱস্থা তুলনামূলকভাৱে অধিক গুৰুতৰ যেন দেখা গৈছে। এক সংবাদ সংস্থাৰ ফুটেজত কেইবাজনো যাত্ৰীক হুইলচেয়াৰত বহুৱাই চিকিৎসাৰ বাবে নিয়া দেখা যায়। এজন যাত্ৰীৰ মুখ আৰু মূৰত বেণ্ডেজ বান্ধি থকাৰ লগতে এখন চকু সম্পূৰ্ণ ঢকা অৱস্থাত দেখা গৈছে। আনহাতে, এগৰাকী কেবিন ক্ৰুক ডিঙিত নেক কলাৰ পিন্ধাই হুইলচেয়াৰত চিকিৎসা কেন্দ্ৰলৈ নিয়া দৃশ্যও পোহৰলৈ আহিছে।

এয়াৰ ইণ্ডিয়াই এক বিবৃতিত কয় যে যাত্ৰী আৰু বিমানকৰ্মীৰ সুৰক্ষাই সংস্থাটোৰ সৰ্বোচ্চ অগ্ৰাধিকাৰ। আহতসকলক সকলো ধৰণৰ সহায় আগবঢ়োৱা হৈছে আৰু ঘটনাটোৰ তদন্তত সংশ্লিষ্ট কৰ্তৃপক্ষক সম্পূৰ্ণ সহযোগিতা কৰা হৈছে।

ঘটনাটোৰ সঠিক কাৰণ এতিয়াও তদন্ত কৰি থকা হৈছে। বিশেষজ্ঞসকলৰ মতে, বৰ্ষাকালত দক্ষিণ-পূব এছিয়াৰ আকাশপথত হঠাৎ টাৰ্বুলেন্সৰ সৃষ্টি হোৱাটো অস্বাভাৱিক নহয়। তেওঁলোকৰ মতে, এনে পৰিস্থিতিত যাত্ৰাৰ সময়ত সদায় ছিটবেল্ট বান্ধি ৰাখিলে আঘাতৰ সম্ভাৱনা বহু পৰিমাণে হ্ৰাস পাব পাৰে।