সাংসদ অজিত কুমাৰ ভূঞাই তেজপুৰ বিশ্ববিদ্যালয় সন্দৰ্ভত কি ক’লে সংসদত?

অসম চুক্তিৰ অংশ হিচাপে ১৯৯৪ চনত স্থাপিত কেন্দ্ৰীয় বিশ্ববিদ্যালয় তেজপুৰ বিশ্ববিদ্যালয়ত বৰ্তমান অব্যাহত থকা অচলাৱস্থাক লৈ সচেতন মহলে উদ্বেগ প্ৰকাশ কৰিছে। বিগত কেইমাহমানৰ পৰা বিশ্ববিদ্যালয় প্ৰশাসনৰ সৈতে জড়িত অনিয়মৰ বিষয়ে উদ্বেগ প্ৰকাশ কৰি ছাত্ৰ-ছাত্ৰীসকলে ধৰ্ণা আৰু বিক্ষোভ প্ৰদৰ্শন কৰি আহিছে।

প্ৰায় দুমাহ ধৰি বিশ্ববিদ্যালয় চৌহদত উপাচাৰ্যগৰাকী অনুপস্থিত থকাৰ ফলত উত্তেজনা বৃদ্ধি পাইছে। ছাত্ৰ-ছাত্ৰী আৰু আনসকলে উপাচাৰ্যই গুৰুতৰ বিষয়বোৰক আওকাণ কৰাৰ অভিযোগ উত্থাপন কৰি দুৰ্নীতি আৰু অপব্যৱস্থাপনাৰ গোচৰ ৰুজু কৰিছে। বহুতে অনুভৱ কৰে যে বিশ্ববিদ্যালয়ৰ পৰা আঁতৰি থাকি উপাচাৰ্যই তেওঁৰ দায়িত্ব এৰাই চলিব নোৱাৰে।

বিশ্ববিদ্যালয়খনৰ সমস্যা সন্দৰ্ভত অসমৰ বিধান সভাত বিৰোধীয়ে আলোচনাৰ বাবে প্ৰস্তাৱ আগ বঢ়াইছিল যদিও সেয়া কাৰ্যকৰী নহ‘ল। অৱশ্যে সাংসদ অজিত কুমাৰ ভূঞাই সংসদৰ শীতকালীন অধিৱেশনৰ দ্বিতীয় দিনা বিশ্ববিদ্যালয়ৰ এই সমস্যাটো উত্থাপন কৰে।

তেওঁ কেন্দ্ৰীয় চৰকাৰক আহ্বান জনাইছে যে উপাচাৰ্য নিযুক্তি দিওঁতে যাতে ৰাজনৈতিক বা অন্যান্য বাহিৰা প্ৰভাৱে প্ৰভাৱ পেলাব নোৱাৰে, তাৰ বাবে সাৱধানতা অৱলম্বন কৰা উচিত।

ছাত্ৰ-ছাত্ৰীসকলৰ বাবে শান্তিপূৰ্ণ আৰু উৎপাদনশীল শৈক্ষিক পৰিৱেশ ঘূৰাই অনাটো যে অতি জৰুৰী, সেই সম্পৰ্কে কোনো দ্বিমত নাই। শিক্ষামন্ত্ৰীক তৎকালীনভাৱে হস্তক্ষেপ কৰি তেজপুৰ বিশ্ববিদ্যালয়ত স্বাভাৱিক অৱস্থা ঘূৰাই অনাত সহায় কৰিবলৈ আহ্বান জনাইছে সাংসদগৰাকীয়ে।