জাঁজীত জাতীয়তাবাদী যুৱ ছাত্ৰ পৰিষদৰ দ্বাৰা বিধায়ক প্ৰদীপ হাজৰিকাৰ প্ৰতিকৃতি দাহ
শিৱসাগৰ জিলাৰ জাঁজীত ৩৭ নং ৰাষ্ট্ৰীয় ঘাই পথত আজি সন্ধিয়া অসম জাতীয়তাবাদী যুৱ ছাত্ৰ পৰিষদৰ জাঁজী আঞ্চলিক সমিতিয়ে আমগুৰি সমষ্টিৰ বিধায়ক প্ৰদীপ হাজৰিকাৰ প্ৰতিকৃতি দাহ কৰে।
যুৱ ছাত্ৰ পৰিষদৰ জাঁজী আঞ্চলিক সমিতিৰ সভাপতি সৌৰভ বৰুৱা, সম্পাদক দীক্ষিত বৰঠাকুৰৰ স্বাক্ষৰিত এক প্ৰেছ বিজ্ঞপ্তি যোগে জানিবলৈ দিছে যে শতবৰ্ষ অতিক্ৰম কৰা জাঁজী সহায়কাৰী চিকিৎসালয়খনৰ পৰিচালনা সমিতিখন গঠন কৰাৰ ক্ষেত্ৰত স্থানীয় ৰাইজৰ মতামতক উপেক্ষা কৰি বিধায়ক গৰাকীয়ে পক্ষপাতিত্বমূলক আৰু অগণতান্ত্ৰিকভাৱে সমিতিখন গঠন কাৰ্যক তীব্ৰভাৱে গৰিহনা দিছে।
বিজ্ঞপ্তিখনত আৰু উল্লেখ কৰে যে বিধায়ক গৰাকীয়ে মইমতালিভাৱে চিকিৎসালয়খনৰ পৰিচালনা সমিতিখন গঠন কৰাৰ বাবেই আজি তেওঁৰ প্ৰতিকৃতি দাহ কৰা হয়।
ইয়াৰোপৰি যুৱ ছাত্ৰ পৰিষদৰ আঞ্চলিক সমিতিখনে বিধায়ক গৰাকীক ৰাজহুৱা সভা আহ্বানৰ জৰিয়তে পৰিচালনা সমিতিখন গঠন কৰিবলৈ দাবী জনাইছে। উল্লেখযোগ্য যে যুৱ ছাত্ৰ পৰিষদৰ জাঁজী আঞ্চলিক সমিতিয়ে এটা মাহৰ পূৰ্বে চিকিৎসালয়খনৰ এখন শক্তিশালী পৰিচালনা সমিতি গঠনকে ধৰি কেইবাটাও গুৰুত্বপূৰ্ণ দাবী পূৰণৰ প্ৰতিবাদ জনাই চিকিৎসালয়খনৰ বাৰাণ্ডাতে দুঘন্টীয়া অৱস্থান ধৰ্মঘট কৰিছিল।
স্মৰ্তব্য যে অহা ১৪ অক্তোবৰত আমগুৰিত অনুষ্ঠিত হ’ব লগা অগপ দলৰ ৩১ সংখ্যক প্ৰতিষ্ঠা দিৱসৰ প্ৰাকমুহূৰ্তত দলটোৰ অন্যতম সাধাৰণ সম্পাদক তথা সমষ্টিটোৰ বিধায়ক গৰাকীৰ প্ৰতিকৃতি দাহ কৰা কাৰ্যটোৱে এক বিশেষ তাৎপৰ্য বহন কৰিছে বুলি ৰাজনৈতিক মহলত চৰ্চিত হৈছে।