ভোগেশ্বৰী ফুকননী অসামৰিক চিকিৎসালয়ত প্ৰসুতিৰ মৃত্যুক লৈ উত্তপ্ত পৰিস্থিতি

নগাঁও ভোগেশ্বৰী ফুকননী অসামৰিক চিকিৎসালয়ত দেওবাৰে এগৰাকী প্ৰসুতিৰ মৃত্যুক কেন্দ্ৰ কৰি উত্তপ্ত পৰিস্থিতিৰ সৃষ্টি হয়। পিছত আৰক্ষীৰ লোক উপস্থিত হৈ পৰিস্থিতি নিয়ন্ত্ৰণ কৰে৷ চিকিৎসকৰ অৱহেলাৰ বাবেই প্ৰসুতিগৰাকীয়ে মৃত্যুক সাৱটিব লগা হয় বুলি অভিযোগ উঠিছে।

প্ৰাপ্ত খবৰ মতে, হোজাই জিলাৰ দেৱৰস্থানৰ মায়াৰুণ নেছা নামৰ এগৰাকী গৰ্ভৱতী মহিলাক শনিবাৰে নিশা নগাঁও ভোগেশ্বৰী ফুকননী অসামৰিক চিকিৎসালয়ত ভৰ্তি কৰোৱা হৈছিল। কিন্তু শনিবাৰৰ নিশাৰ পৰা দেওবাৰৰ পুৱালৈকে মহিলাগৰাকীক চিকিৎসকে কোনোধৰণৰ চিকিৎসা প্ৰদান নকৰাকৈ বিচনাত পেলাই থয়।

পৰিয়ালৰ লোকে অভিযোগ কৰা মতে, দেওবাৰে পুৱাহে চিকিৎসালয় কৰ্তৃপক্ষই প্ৰসুতি মহিলাগৰাকীক এটা চেলাইন দিয়ে। ইপিনে চেলাইনটো দিয়াৰ কিছু সময়ৰ পিছতে প্ৰসুতিগৰাকীয়ে মৃত্যুক সাবটি লয়।

আনহাতে, পৰিয়ালৰ লোকে চিকিৎসালয়খনৰ নাৰ্ছৰ বিৰুদ্ধে ধন দাবীৰো অভিযোগ তোলে৷ পিছত এই লৈ চিকিৎসালয়খনত পৰিয়ালৰ লোকে এক উত্তপ্ত পৰিস্থিতিৰ সৃষ্টি কৰে।

চিকিৎসকৰ অৱহেলাৰ বাবে ৰোগীৰ মৃত্যু ঘটাতো চিকিৎসালয়খনত এক সাধাৰণ ঘটনাত পৰিণত হৈছে যদিও সচিকিৎসালয় কৰ্তৃপক্ষই সদায়েই আওকণীয়া মনোভাৱ গ্ৰহণ কৰি আহিছে। দেওবাৰৰ এই ঘটনাটোতো চিকিৎসালয়খনৰ গাফিলতিৰ কথা কৰ্তৃপক্ষই অস্বীকাৰ কৰিছে।