চীনা ৰাষ্ট্ৰপতিলৈ ৰামায়ণ প্ৰেৰণ উত্তৰাখণ্ডৰ পৰ্যটন মন্ত্ৰীৰ; ৰাৱণৰ চৰিত্ৰৰ পৰা শিক্ষা লাভৰ বাবে আহ্বান

বিস্তাৰবাদী নীতিয়ে যে ধ্বংস মাতে সেই উদাহৰণৰ বাবে চীনৰ ৰাষ্ট্ৰপতি ঝি ঝিনপিঙলৈ ভাৰতীয় ধৰ্মমূলক গ্ৰন্থ ৰামায়ণ প্ৰেৰণ কৰিছে বুলি মঙলবাৰে মন্তব্য কৰে উত্তৰাখণ্ডৰ পৰ্যটন মন্ত্ৰী সতপাল মহাৰাজে ।

জানিব পৰা মতে, মহাৰাজে চীনৰ ৰাষ্ট্ৰপিলৈ কেনেদৰে ৰামায়ণত ৰাৱণে নিজৰ পতন নিজে মাতি আনিছিল সেই বিষয়েও বিশেষভাৱে উল্লেখ কৰিছে।

সংবাদমাধ্যৰ আগত এই সম্বন্ধে মত ব্যক্ত কৰি মহাৰাজে কয় যে, ৰামায়ণত দহটা মুণ্ডধাৰী ৰাৱণৰ জ্ঞান আৰু শক্তি কোনোগুণে কম নাছিল যদিও ৰাৱণৰ ধ্ৱংসাত্মক চিন্তাই নিজৰ লগতে লংকাৰ পতন মাতিছিল।

চীনৰ ৰাষ্ট্ৰপতিলৈ ৰামায়ণ প্ৰেৰণ কৰি মহাৰাজে ঝিনপিঙক ৰামায়ণ অধ্যয়ণ কৰি কেনেদৰে জ্ঞানী ৰাৱণৰো অংহাৰৰ ফলত পতন হৈছিল সেই কথা অনুধাৱন কৰিবলৈ আহ্বান জনোৱা বুলি কয়।

উত্তৰাখণ্ডৰ পৰ্যটন মন্ত্ৰী গৰাকীয়ে চীনৰ চৰকাৰ আৰু জনসাধাৰণক তেওঁলোকৰ টকা অস্ত্ৰ-সস্ত্ৰ ক্ৰয় আৰু সেনাবাহিনীৰ নামত খৰচ কৰাত কৈ বিকাশ আৰু কোভিড-১৯ৰ বিৰুদ্ধে যুদ্ধত ব্যয় কৰাৰ বাবেও আহ্বান জনায়।