মোদী হ’লেও, চকীদাৰ নহয় শিলাদিত্য!

দেশৰ সাধাৰণ নিৰ্বাচনৰ প্ৰাক মু্হূৰ্তত প্ৰধান মন্ত্ৰী নৰেন্দ্ৰ মোদীয়ে আৰম্ভ কৰা “চকীদাৰ” ছিৰিজৰ এতিয়াও বাহিৰত অৱস্থান কৰিছে বিজেপি বিধায়ক শিলাদিত্য দেবে।

অসমত বিভিন্ন সময়ত ব্যাপক বিতৰ্কৰ পিছতো গেৰুৱা দলটোৰ আদৰ্শনিষ্ঠ সমৰ্থকৰূপে থিয় দি অহা হোজাইৰ বিধায়কজনৰ এই স্থিতি, তাকো নিৰ্বাচনৰ বতৰত, আচহুৱা ৰূপে বিবেচিত হৈছে।

মূলতঃ টুইটাৰ-চৰ্চিত “চকীদাৰ” ত্ৰেন্দৰ বাহিৰত থাকি আজিও ক্লাছিক “শিলাদিত্য দেব”-তেই অবিচল হৈ ৰৈছে বিধায়কজন।

অৱশ্যে “চকীদাৰ” চৰ্চাত দেব অসমত একেবাৰে অকলশৰীয়া নহয়; আসন্ন নিৰ্বাচনৰ টিকেট নোপোৱা কামাখ্যা প্ৰসাদ তাছা আৰু ৰামপ্ৰসাদ শৰ্মাৰো অদ্যপি চকীদাৰকৰণ হোৱা নাই।

নিষ্ঠাৱান “আৰ এচ এচ” আৰু ৰাজনীতিৰ “বাঘ”ৰূপে স্ব-পৰিচয় ঘোষণা কৰা তেজপুৰৰ সাংসদ আৰ পি-এ আকৌ “চকীদাৰ” পদক লৈয়ে আগ্ৰহ প্ৰকাশ কৰা নাই। “চকীদাৰ নহওঁ, হ’লে ৰাইজৰ চাকৰ হ’ম,” টিকেট নাপাই যথেষ্ঠ হতাশ হোৱা, ন-বিজেপিয়েও মূৰ গৰম কৰা জ্যেষ্ঠ নেতা শৰ্মাৰ মন্তব্য।

“চকীদাৰ” চৰ্চাত বিৰোধীৰ কঠোৰ সমালোচনাৰো সন্মুখীন হ’ব লগা হৈছে গেৰুৱা দলৰ লগতে প্ৰধান মন্ত্ৰী মোদী। ৰাহুল গান্ধীৰ উপৰি অৰৱিন্দ কেজৰিৱাল, মায়াৱতী আদিয়েও চলাইছে তীব্ৰ আক্ৰমণ।

“আপোনাৰ ল’ৰা-ছোৱালী যদি চকীদাৰ হোৱাটো বিচাৰে, মোদীকে ভোট দিয়ক,” এয়া কেজৰিৱালৰ মন্তব্য। আনহাতে মায়াৱতীৰ মতে, নিৰ্বাচনৰ পিছতে চকীদাৰ হোৱাৰ বাবে যথাৰ্থ মুক্তি পাব বিজেপি নেতা-নেত্ৰীসকলে।

মোদীৰ আৰম্ভ কৰা “চকীদাৰ” আন্দোলনত গেৰুৱা দলটোৰ ৰাষ্ট্ৰীয় সভাপতি অমিত চাহৰ তৎকালীন যোগদানৰ পিছতে সমগ্ৰ দেশৰ বিজেপি নেতা-মন্ত্ৰী-পালিনেতাকে ধৰি সমৰ্থকেও নিজৰ নামৰ আগত স্ব-আৰোপিত বিশেষণটো যোগ দিছিল।