ক’ৰ’না আতংকৰ মাজতে শিৱসাগৰৰ এইসকল যুৱকে লৈছে প্ৰশংসনীয় পদক্ষেপ
ক’ৰ’না ভাইৰছৰ আতংকই দেশৰ জনসাধাৰণক ভীতিগ্ৰস্ত কৰি তোলাৰ সময়তে শিৱসাগৰৰ কেইজনমান যুৱকে প্ৰশংসনীয় পদক্ষেপ গ্ৰহণ কৰিছে।
শিৱসাগৰৰ নাওজান গাঁৱৰ যোগ টেক্সটাইলৰ স্বস্বাধিকাৰী তুলতুল সন্দিকৈয়ে তেওঁৰ শালত মাক্স তৈয়াৰ কৰি শিৱসাগৰ অসামৰিক চিকিৎসালয়, জিলা কাৰাগাৰ, আৰক্ষী বিভাগ, স্বাস্থ্য কৰ্মী, সংবাদকৰ্মী তথা জৰুৰী সেৱাত ব্ৰতী শিৱসাগৰ জিলা প্ৰশাসনৰ কৰ্মচাৰীসকলৰ মাজত সম্পূৰ্ণ বিনামূলীয়াকৈ বিতৰণ কৰিছে।
ঠিক একেদৰে ডিমৌৰ ন-হাটৰ দুই যুৱক হোমেন গগৈ আৰু বিতুপন গগৈয়ে সম্পূৰ্ন নিজা খৰচত দিন হাজিৰা কৰি জীৱন নিৰ্বাহ কৰা ৮৫ টা পৰিয়ালৰ মাজত আটা, চাউল, দাইল, বিস্কুত, চাবোন, ডেটল আৰু চেনিজাইজাৰ বিতৰণ কৰি মানৱতাৰ পৰিচয় দাঙি ধৰিছে।
আনহাতে ক’ৰ’না ভাইৰাছৰ সংক্ৰমণ ৰোধৰ বাবে শিৱসাগৰৰ শিখ সম্প্ৰদায়ৰ কেইজনমান যুৱকে শিৱসাগৰ আৰক্ষী থানা আৰু ষ্টেশ্যন চাৰিআলিৰ বজাৰ তথা ৰাজপথ চেনিটাইজিং কৰে।
মানৱীয়তাৰ নিদৰ্শন দাঙি ধৰা এই যুৱককেইজনৰ পদক্ষেপক শিৱসাগৰবাসীয়ে ভূয়সী প্ৰশংসা কৰিছে।