আজিৰে পৰা সমগ্ৰ দেশতে গাখীৰৰ মূল্য প্ৰতি লিটাৰত ২ টকা বৃদ্ধি কৰিলে Amulয়ে

যোৱা ১ জুনত শেষ পৰ্যায়ৰ ভোটদানৰ অন্ত পৰিল। তাৰপিছতে এক্সিট প’লে সম্ভাৱ্য চৰকাৰৰ পূৰ্বানুমানো দাঙি ধৰিলে। এই সকলোবোৰ জল্পনা-কল্পনা, চৰ্চা-প্ৰতিক্ৰিয়াৰ মাজতে ‘আমুল’য়ে সমগ্ৰ দেশতে গাখীৰৰ মূল্য বৃদ্ধি কৰাৰ কথা ঘোষণা কৰিছে। সোমবাৰৰ পৰা সকলো ধৰণৰ আমুল গাখীৰৰ মূল্য প্ৰতি লিটাৰত ২ টকা বৃদ্ধি পাব।

আমুল গাখীৰ প্ৰস্তুতকাৰী সংস্থা গুজৰাট কো-অপাৰেটিভ মিল্ক মাৰ্কেটিং ফেডাৰেচন লিমিটেডে কয় যে এই সিদ্ধান্তৰ কাৰণ হৈছে উৎপাদন আৰু বিতৰণৰ ব্যয় বৃদ্ধি। কোম্পানীটোৰ পৰিচালন সঞ্চালক জয়েন মেহতাই কয় যে ৩ জুনৰ পৰা দেশজুৰি এই নতুন মূল্য প্ৰৱৰ্তন কৰা হ’ব। উৎপাদনৰ ব্যয় বাঢ়ি অহাৰ লগে লগে এই মূল্য বৃদ্ধি কৰাৰ বাহিৰে আন উপায় নাছিল।

লগতে পঢ়কঃ নিৰ্বাচন শেষ, আৰম্ভ মূল্যবৃদ্ধিৰ খেল! মাজনিশাৰ পৰাই ৫ শতাংশ টোল টেক্স বৃদ্ধি NHAIৰ

সোমবাৰৰ পৰা ৫০০ মিলিলিটাৰ ম’হৰ গাখীৰ, আমুল গোল্ড আৰু আমুল শক্তিৰ মূল্য ক্ৰমে ৩৬ টকা, ৩৩ টকা আৰু ৩০ টকা হ’ব। শেষবাৰৰ বাবে আমুল গাখীৰৰ দাম বৃদ্ধি হৈছিল ২০২৩ চনৰ ফেব্ৰুৱাৰী মাহত।

কোম্পানীটোৰ এক বিবৃতিত কোৱা হৈছে যে, “প্ৰতি লিটাৰত ২ টকা মূল্য বৃদ্ধিৰ অৰ্থ হ’ল এম আৰ পি ৩ৰ পৰা ৪ শতাংশ বৃদ্ধি। যিটো খাদ্যৰ দাম বৃদ্ধিৰ হাৰৰ তুলনাত অতি কম। লগতে মন কৰিবলগীয়া যে ২০২৩ চনৰ ফেব্ৰুৱাৰী মাহৰ পৰা আমুলে গাখীৰৰ দাম বৃদ্ধি কৰা নাই। কিন্তু আনুষংগিক সামগ্ৰীৰ খৰচ বৃদ্ধি পোৱাৰ লগে লগে এই পদক্ষেপ লোৱা হৈছে।”

লগতে পঢ়কঃ আজি আকাশত একে শাৰীতে অৱস্থান কৰিব ছটা গ্ৰহ! ক’ৰ পৰা দেখা যাব এই বিৰল মহাজাগতিক দৃশ্য?

সংস্থাটোৱে লগতে জনাইছে যে তেওঁলোকৰ নীতি অনুসৰি গ্ৰাহকে দিয়া প্ৰতিটো টকাৰ ৮০ পইচা উৎপাদকক দিয়া হয়। এই মূল্যবৃদ্ধিৰ ফলত তেওঁলোকেও উৎপাদন বৃদ্ধিৰ বাবে উৎসাহিত হ’ব।