এইটো দশম, কুনো অভয়াৰণ্যত আন এটি চিতা বাঘৰ মৃত্যু; স্পষ্ট হোৱা নাই ‘শৌৰ্য’ৰ মৃত্যুৰ কাৰণ

কেইদিনমানৰ বিৰতি। কিন্তু বিপদ নাতৰিল। মধ্যপ্ৰদেশৰ কুনো ৰাষ্ট্ৰীয় উদ্যানত পুনৰ মৃত্যু ঘটিছে আন এটা চিতাৰ। ইয়াৰ লগে লগে কুনোত এতিয়ালৈকে ১০টা চিতা মৃত্যুমুখত পৰিল। মঙলবাৰে মৃত্যু হোৱা চিতাটোও নামিবিয়াৰ পৰা ইয়ালৈ অনা হৈছিল। ইয়াৰ নাম ৰখা হৈছিল শৌৰ্য।

কুনোৰ এই দশম চিতাৰ মৃত্যুৰ কাৰণ এতিয়াও স্পষ্ট হোৱা নাই। কুনো ৰাষ্ট্ৰীয় উদ্যানৰ মতে চিতাটোৰ মৃতদেহ মৰণোত্তৰ পৰীক্ষাৰ বাবে প্ৰেৰণ কৰা হৈছে।

ব্যাঘ্ৰ প্ৰকল্পৰ সঞ্চালক অতিৰিক্ত মুখ্য বন সংৰক্ষকে প্ৰকাশ কৰা এক বিবৃতিত কোৱা হৈছে যে, ‘আজি ১৬ জানুৱাৰীত বিয়লি ৩.১৭ বজাত নামিবিয়াৰ পৰা অনা শৌৰ্য নামৰ চিতাটোৰ মৃত্যু হয়। ৰাতিপুৱা ১১ বজাৰ ভিতৰত চিতাটোৰ আচৰণ অস্বাভাৱিক হৈ পৰিছিল, ইয়াৰ গতিবিধি দেখি সন্দেহ উপজিছিল। প্ৰথমে চিতাটোক শান্ত কৰা হয়, তাৰ পিছত পৰীক্ষা কৰি অত্যন্ত দুৰ্বল হোৱা দেখা যায়’।

লগতে পঢ়কঃ বাৰাণসীৰ জ্ঞানবাপী মছজিদৰ বিতৰ্কিত অংশ খোলাৰ নিৰ্দেশ দিলে উচ্চতম ন্যায়ালয়ে!

ইয়াৰ পিছত চিতাটোক বচাবলৈ চেষ্টা কৰা হৈছিল যদিও জটিলতা বৃদ্ধি পোৱাৰ লগে লগে চিপিআৰ দিও কাম নহ’ল। বিবৃতি অনুসৰি মৰণোত্তৰ পৰীক্ষাৰ পিছত মৃত্যুৰ সঠিক কাৰণ জানিব পৰা যাব।

ইয়াৰ লগে লগে মধ্যপ্ৰদেশৰ কুনো ৰাষ্ট্ৰীয় অৰণ্যত ৭টা প্ৰাপ্তবয়স্ক আৰু তিনিটা পোৱালিকে ধৰি ১০টা চিতাৰ মৃত্যু হয়। কেইবাটাও ক্ষেত্ৰত চিতাৰ মৃত্যুত সংক্ৰমণৰ প্ৰশ্ন উঠিছে। ব্যৱস্থাপনাৰ ক্ষেত্ৰতো প্ৰশ্ন উত্থাপন হৈছে।

যোৱা বছৰৰ ২ আগষ্টত শেষবাৰ নৱমটো চিতাৰ মৃত্যু হৈছিল। বাৰে বাৰে চিতাৰ মৃত্যুৰ বিষয়টো সংসদতো উঠিছিল। তাত সংক্ৰমণৰ তত্ত্ব উপস্থাপন কৰা হৈছিল। সংসদত জনোৱা হৈছিল যে বাৰিষাৰ সময়ত পোক-পৰুৱাৰ দ্বাৰা আক্ৰান্ত হৈ শেষৰ দুটা চিতাৰ মৃত্যু হৈছিল। ইয়াৰ পিছত কেইমাহমানৰ বিৰতি আছিল। এইবাৰ আন এটা চিতাৰ মৃত্যু ঘটিল।

একেৰাহে চিতাৰ মৃত্যুৰ বাবে কেন্দ্ৰৰ নৰেন্দ্ৰ মোডী চৰকাৰো প্ৰশ্নৰ আওতালৈ আহিছে। যদিও বিদেশৰ পৰা অতি ধুমধামেৰে চিতা আমদানি কৰা হৈছিল, তথাপিও ইয়াৰ পৰিচালনাৰ ক্ষেত্ৰত গাফিলতিৰ অভিযোগ উত্থাপন হৈছে।

লগতে পঢ়কঃ গুৰুদ্বাৰৰ ‘পৱিত্ৰতা’ নষ্ট কৰাৰ অভিযোগত পঞ্জাৱত হত্যা যুৱকক! অভিযুক্ত নিহাং শিখ

আনকি বিশেষজ্ঞসকলেও বহিঃৰাষ্ট্ৰৰ পৰাও এই বিষয়ে লিখিছে। তেওঁলোকে অভিযোগ কৰে যে কুনো ৰাষ্ট্ৰীয় উদ্যানত বিশেষজ্ঞ চিকিৎসক নাই আৰু যিসকল আছে তেওঁলোকৰ কথাও নুশুনে। কেৱল সেয়াই নহয়, পশু বিশেষজ্ঞসকলে নিম্নমানৰ ৰেডিঅ’ কলাৰ ব্যৱহাৰ আৰু অপব্যৱস্থাপনাৰ বাবে দোষাৰোপ কৰিছে। কিন্তু চৰকাৰে সেয়া মানি ল’বলৈ অনিচ্ছুক।