অসমীয়া বছৰৰ প্ৰথম দিনটোতে অগপত আন এটা ডাঙৰ আঘাত; দল এৰিলে প্ৰাক্তন মন্ত্ৰীয়ে

ৰঙালী বিহুৰ উৎসাহ-উদ্দীপনাত সকলো অসমীয়া ডুব গৈ থাকোতেই অন্যতম আঞ্চলিক দল অসম গণ পৰিষদলৈ আহিল আন এটা বেয়া খবৰ। বিজেপিৰে পুনৰ মিত্ৰতা কৰাৰ প্ৰতিক্ৰিয়া হিচাপে এজনৰ পাছত আনজন নেতাৰ দলত্যাগৰ সোঁত বহাগৰ প্ৰথম দিনটোতো অব্যাহত থাকিল। আজি আঞ্চলিক দলটো এৰিলে জ্যেষ্ঠ নেতা তথা প্ৰাক্তন মন্ত্ৰী বুবুল দাসে।

সভাপতি অতুল বৰালৈ ১৫ এপ্ৰিলত প্ৰেৰণ কৰা পদত্যাগ পত্ৰত তেওঁ মৰিগাঁও জিলা সমিতিৰ সভাপতি পদৰ লগতে দলটোৰ প্ৰাথমিক সদস্য পদো ত্যাগ কৰা বুলি উল্লেখ কৰে।

“মহোদয়, ইতিহাস বৰ নিষ্ঠুৰ! ই কাকো ক্ষমা নকৰে। ৰাজনীতিত সকলো সম্ভৱ বুলি যিমানেই চেষ্টা নকৰক কিয় সি কেতিয়াও স্থায়ী নহয়”, বিজেপিৰে মিত্ৰতা তথা দলৰ অভ্যন্তৰীণ গণতন্ত্ৰ ধ্বংসৰ প্ৰসংগেৰে সভাপতিলৈ লিখা পত্ৰখনত দাসে কয়।

মিত্ৰতাৰ বিষয়ত সভাপতি অতুল বৰাক কঠোৰ ভাষাৰে সমালোচনা কৰি বুবুল দাসে লিখিছে, “নিৰ্বাচনৰ গইনা লৈ আপুনি আকৌ বিশ্বাসঘাতক ভাজপাৰ লগত মিত্ৰতাৰ নামত ৰাতিটোৰ ভিতৰতে অসমৰ জাতীয়তাবাদ আৰু আঞ্চলিকতাবাদক ভৰিৰে মোহাৰি আৰু অসমীয়া জাতিলৈ কালৰাত্ৰি নমাই অনা ‘নাগৰিকত্ব সংশোধনী বিধেয়ক’ৰ পৃষ্ঠপোষক ভাজপাৰ নিৰ্বাচনী মিত্ৰতাৰ নামত মন্ত্ৰিত্ব লৈ অসমীয়া জাতি আৰু অসম গণ পৰিষদ দলৰ সকলো পৰম্পৰা আৰু গণতন্ত্ৰক কবৰ দিবলৈও কুন্ঠাবোধ নকৰিলে। অসম গণ পৰিষদৰ ইতিহাসত এই দিনটোও স্মৰণীয় হৈ থাকিব। ই এক কলংকিত অধ্যায় হিচাপে। আৰু কোনো দিন এই কলংকৰ দাগ মছিব নোৱাৰে”।

যোৱা বিধানসভা নিৰ্বাচনৰ সময়ত জাগীৰোড সমষ্টিত তেওঁক দলৰ টিকট প্ৰদান কৰিও মনোনয়ন পত্ৰ দাখিলৰ মাথোঁ এদিন পূৰ্বে সমষ্টিটো মিত্ৰতাৰ নামত বিজেপিক দি কৰা অপমানৰ কথাও উল্লেখ কৰে প্ৰাক্তন মন্ত্ৰীজনে। “২০১৬ৰ সেই দিনটোৰ পৰাই জাগীৰোড সমষ্টিত অগপৰ ৰাজনৈতিক গতিধাৰাক অন্ধকাৰৰ অটল গহ্বৰলৈ থেলি দিলে”, ৩৪ বছৰ দলক সেৱা আগ বঢ়োৱা বুলি কোৱা বুবুল দাসে কয়।

নাগৰিকত্ব সংশোধনী বিধেয়কৰ বিৰোধিতাৰে অতুল বৰাই “মন্ত্ৰিত্বতকৈ জাতি ঊৰ্ধ্বত” বুলি কৈ মন্ত্ৰীপদ ত্যাগ কৰাৰ পাছত পুনৰ মন্ত্ৰীৰ আসনত বহা কাৰ্য্যক ধিক্কাৰ দিয়ে দাসে। তেওঁ ইয়াৰ পৰিণামৰ কথাও সকীয়াই দিয়ে।

উল্লেখযোগ্য যে, অসম আন্দোলনৰ নেতা বুবুল দাসে ১৯৯১ আৰু ১৯৯৬ চনত দুবাৰকৈ জাগীৰোড সমষ্টিৰ পৰা অগপৰ প্ৰাৰ্থী হিচাপে নিৰ্বাচিত হোৱাৰ উপৰি প্ৰফুল্ল কুমাৰ মহন্তৰ দ্বিতীয়টো কাৰ্য্যকালত মীন বিভাগৰ মন্ত্ৰীও আছিল। তেওঁ মৰিগাঁও জিলা অগপৰ তিনিবাৰৰ সভাপতি আৰু কেন্দ্ৰীয় সমিতিৰ দুবাৰৰ উপ-সভাপতিও আছিল।