অযোধ্যা গোচৰৰ আদালতৰ ৰায়: সকলোকে শান্তি-সম্প্ৰীতি বজাই ৰখাৰ আহ্বান প্ৰদেশ কংগ্ৰেছৰ

আজি উচ্চতম ন্যায়ালয়ে অযোধ্যা গোচৰৰ ৰায়দান কৰি বিবাদিত ভূমি ৰাম মন্দিৰৰ বাবে প্ৰদান কৰাৰ লগতে ছুন্নী ৱাকফ বোৰ্ডক বিকল্প ভূমি প্ৰদানৰ নিৰ্দেশ দিয়ে।

উচ্চতম ন্যায়ালয়ৰ আজিৰ ঐতিহাসিক ৰায়টোক সন্মান জনাইছে অসম প্ৰদেশ কংগ্ৰেছ সমিতিয়ে।

শনিবাৰে গুৱাহাটীৰ ৰাজীৱ ভৱনত অনুষ্ঠিত এখন সংবাদমেলত প্ৰদেশ কংগ্ৰেছৰ সভাপতি ৰিপুন বৰাই কয় যে তেওঁলোকে উচ্চতম ন্যায়ালয়ৰ এই ঐতিহাসিক ৰায়দানক সন্মান জনাইছে।

বৰাই সকলো শ্ৰেণীৰ লোককে শান্তি-সম্প্ৰীতি বজাই ৰাখিবলৈ আহ্বান জনায়।

তেওঁ জানিবলৈ দিয়ে যে নিখিল ভাৰত কংগ্ৰেছ কমিটিয়ে সকলোকে ভাতৃত্ব বোধ বজাই ৰাখিবলৈ আহ্বান জনাইছে।

নিখিল ভাৰত কংগ্ৰেছ কমিটিৰ কাৰ্যকৰী কমিটিৰ বৈঠকৰ পাছতে এই সিদ্ধান্ত লোৱা বুলিও ৰিপুন বৰাই জানিবলৈ দিয়ে।

উল্লেখযোগ্য যে উচ্চতম ন্য়ায়ালয়ে আজি বহু প্ৰতীক্ষিত অযোধ্যাৰ ৰাম জনমভূমি-বাবৰি মছজিদ গোচৰৰ ৰায়দান কৰে।

মুখ্য ন্যায়াধীশ ৰঞ্জন গগৈৰ নেতৃত্বৰ পাঁচজনীয়া ন্যায়াধীশৰ বিচাৰপীঠে এই বহু বিবাদিত গোচৰটোৰ ৰায়দান কৰে।

আদালতে চৰ্ত অনুসৰি বিবাদিত ভূমিখিনি হিন্দু সকলক ৰাম মন্দিৰ নিৰ্মাণৰ বাবে দিয়াৰ নিৰ্দেশ দিছে। ইয়াৰ বাবে কেন্দ্ৰীয় চৰকাৰে এখন আঁচনি প্ৰস্তুত কৰিব।

গোটেই বিষয়টোৰ বাবে এখন ন্যাস গঠন কৰা হ’ব আৰু এই ন্যাসক আভ্যন্তৰীণ চৌহদটো হস্তান্তৰ কৰা হ’ব।

আনহাতে, ছুন্নী ৱাকফ বোৰ্ডক দিয়া হ’ব ৫ একৰ ভূমিৰ এক উপযুক্ত প্লট।

কেন্দ্ৰই অহা তিনিমাহৰ ভিতৰত বোৰ্ড অফ ট্ৰাষ্টীৰে এখন ট্ৰাষ্ট বা ন্যাস গঠন কৰিব লাগিব।