শীঘ্ৰে বলৱৎ হ’ব ‘কা’ : কা বিৰোধী প্ৰতিবাদলৈ সমৰ্থন জনাই সাজু আম আদমি পাৰ্টি

চৰকাৰে নাগৰিকত্ব সংশোধনী আইন ৰূপায়ন কৰিবলৈ আগবঢ়াৰ সময়ছোৱাত ইয়াৰ বিৰুদ্ধে প্ৰতিক্ৰিয়া প্ৰকাশ কৰি প্ৰেছ বিজ্ঞপ্তি মুকলি কৰিছে আম আদমি পাৰ্ট, অসমে। 

প্ৰেছ বিজ্ঞপ্তিটো প্ৰকাশ কৰি আপ, অসমে কয় যে যিকোনো মুল্যৰ বিনিময়তে নাগৰিকত্ব সংশোধনী আইন ৰূপায়ন মানি লোৱা নহ’ব৷ 

আপ, অসমৰ সভাপতি ডাঃ ভবেন চৌধুৰীয়ে উল্লেখ কৰে যে অসমৰ লাখ লাখ নিবনুৱা যুৱক-যুৱতীকে নিয়োজন দিব নোৱাৰা এইখন বিফল চৰকাৰে কা-ৰ যোগেদি বিদেশৰ ব্যক্তিক অসমলৈ আমদানি কৰি খিলঞ্জীয়াৰ সামাজিক-ৰাজনৈতিক আৰু অৰ্থনৈতিক অধিকাৰ কাঢ়ি নিবলৈ আগবাঢ়িছে। তাতোকৈ ডাঙৰ কথাটো হ’ল যে ভাষাভিত্তিক গঠিত অসমীয়া জাতিয়ে ‘কা’ৰ কুপ্ৰভাৱৰ বাবে ভাষাগত সংখ্যাগৰিষ্ঠতা হেৰুৱাব। বিগত লোকপিয়লসমূহ চালে এই বিষয়ে অধিক স্পষ্ট ধৰণা কৰিব পাৰি৷ 

বিজেপিয়ে কেৱল নিজৰ ভোটবেংকৰ সুৰক্ষাৰ বাবে ‘কা’ৰ দৰে এখন সাম্প্ৰদায়িক আইন অসমৰ ৰাইজৰ ইচ্ছা আৰু স্বাৰ্থৰ বিৰুদ্ধে গৈ হ’লেও ৰূপায়ন কৰিবলৈ আগবাঢ়িছে, এই বক্তব্য আপৰ। 

প্ৰেছ বিজ্ঞপ্তিটোত আপে লগতে ঘোষণা কৰে যে যদিহে চৰকাৰে অসমৰ থলুৱা সকলৰ আৱেগ-অনুভূতিৰ বিৰুদ্ধে গৈ ‘কা’ বলৱৎ কৰে তেন্তে আপে ইয়াৰ বিৰুদ্ধে গণতান্ত্ৰিক পদ্ধতিৰে ধাৰাবাহিক আন্দোলন আৰম্ভ কৰিব৷ তদুপৰি অসমৰ থধলগিৰী ৰাইজে ‘কা’ৰ বিৰুদ্ধে কৰা যিকোনো গণতান্ত্ৰিক আন্দোলনক সমৰ্থন কৰিব আম আদমি পাটীয়ে।