এপিএছচিৰ ভিতৰচৰাত চলিছে কি? ফলাফল ঘোষণাৰ কেইঘণ্টামানৰ ভিতৰতে বাতিল হ’ল তালিকা

অসম লোকসেৱা আয়োগৰ (APSC) স্বচ্ছতাক লৈ পুনৰবাৰ তীব্ৰ প্ৰশ্ন উত্থাপন হৈছে। আয়োগে সোমবাৰে ঘোষণা কৰা সংযুক্ত প্ৰতিযোগিতামূলক পৰীক্ষা (CCE) ২০২৪-ৰ চূড়ান্ত ফলাফলসমূহ হঠাতে বাতিল কৰা কাৰ্যই সমগ্ৰ ৰাজ্যতে তীব্ৰ চাঞ্চল্যৰ সৃষ্টি কৰিছে। আয়োগৰ তৰফৰ পৰা এক ‘অনিচ্ছাকৃত ত্ৰুটি’ৰ দোহাই দি এই ফলাফলসমূহ প্ৰত্যাহাৰ কৰা বুলি সদৰী কৰা হৈছে যদিও, এই চৰম গাফিলতিৰ অন্তৰালত প্ৰকৃততে কি ৰহস্য লুকাই আছে— তাক লৈ এতিয়া সৰ্বত্ৰে চৰ্চা চলিছে।

এপিএছচিৰ পৰীক্ষা নিয়ন্ত্ৰকৰ তৰফৰ পৰা নিশ্চিত কৰা অনুসৰি, পত্ৰ নম্বৰ 460PSC/CON/Exam371/2024-2025-ৰ অধীনত অধিসূচিত কৰা ফলাফলসমূহ তৎকালিনভাৱে প্ৰত্যাহাৰ কৰা হৈছে। আয়োগে জনাইছে যে সমগ্ৰ ফলাফলৰ তালিকাখন পুনৰীক্ষণ কৰা হ’ব আৰু সম্পূৰ্ণ পৰ্যালোচনাৰ অন্ততহে এখন সংশোধিত তালিকা প্ৰকাশ কৰা হ’ব।

ফলাফল বাতিল হোৱাৰ পূৰ্বে একাংশ সূত্ৰৰ পৰা জানিব পৰা মতে, গুৱাহাটীৰ নীহাৰ ৰঞ্জন ডেকাই ৰাজ্যৰ ভিতৰত শীৰ্ষ স্থান দখল কৰি অসম অসামৰিক সেৱাৰ (কনিষ্ঠ শাখা) বাবে নিৰ্বাচিত হৈছিল। একেদৰে ৰজনীশ শৰ্মাই দ্বিতীয় আৰু পাঞ্চালী দেৱীয়ে তৃতীয় স্থান লাভ কৰা বুলি চৰ্চা হৈছিল। কিন্তু ফলাফল বাতিলৰ এই হঠকাৰী সিদ্ধান্তে এতিয়া সফল প্ৰাৰ্থীসকলৰ লগতে তেওঁলোকৰ পৰিয়ালবৰ্গৰ মাজতো চৰম উৎকণ্ঠা আৰু অনিশ্চয়তা নমাই আনিছে।

অসম চৰকাৰৰ বিভিন্ন বিভাগৰ মুঠ ২৮৮ টা খালী পদ পূৰণৰ লক্ষ্যৰে এই বৰ্ষৰ চিচিই পৰীক্ষা অনুষ্ঠিত কৰা হৈছিল। ফলাফলক লৈ সৃষ্টি হোৱা এই অনিশ্চয়তাৰ বাবে এতিয়া হাজাৰ হাজাৰ পৰীক্ষাৰ্থী চিন্তিত হৈ পৰিছে।