প্ৰথমবাৰৰ বাবে কাজিৰঙাৰ লাওঁখোৱা বুঢ়াচাপৰি অভয়াৰণ্যত জলচৰ পক্ষীৰ গননা

কাজিৰঙা ৰাষ্ট্ৰীয় উদ্যানৰ পাছতে দেওবাৰে কাজিৰঙা বাঘ্ৰ প্ৰকল্পৰ লাওখোৱা বুঢ়াচাপৰি অভয়াৰণ্যত জলচৰ পক্ষীৰ গননা চলোৱা হয়। কালি পুৱা অভয়াৰণ্যখনৰ মুঠ ৮টা স্থানত এই গননা কৰা হয়।

দেওবাৰে পুৱতি নিশা অভয়াৰণ্যখনৰ ধনিয়া বনাঞ্চলৰ বিভাগীয় অতিথিশালাত আয়োজিত এক বিশেষ অনুষ্ঠানত কাজিৰঙাৰ সঞ্চালক পি শিৱকুমাৰে আনুষ্ঠানিকভাৱে গননাৰ কাৰ্যসূচীৰ শুভাৰম্ভ কৰে।

অনুষ্ঠানত নগাঁও বন্যপ্ৰাণী সংমণ্ডলৰ ডি এফ অ’ টি চি ৰঞ্জিত ৰাম, কাজিৰঙাৰ গৱেষণা বিষয়া ৰবীন্দ্ৰ শৰ্মা, অভয়াৰণ্যখনৰ বনাঞ্চলিক বিষয়া বিভূতি ৰঞ্জন গগৈ, জ্ঞানেন্দ্ৰ মণ্ডল আৰু অৰবিন্দ ডেকাৰ উপৰিও নগাঁও জিলা আৰু গোলাঘাট জিলাৰ অনাৰেৰী ৱাইল্ড লাইফ ৱাৰ্ডেন ক্ৰমে সমৰজিত ওজা আৰু উত্তম শইকীয়া উপস্থিত থাকে।

প্ৰথমবাৰৰ বাবে অভয়াৰণ্যখনত চলোৱা জলচৰ পক্ষীৰ এই গননাত বিশিষ্ট পক্ষীবিদ কাজিৰঙাৰ ৰফিকুল ইচলাম, তেজপুৰৰ অনুজ শইকীয়া, মাচিহ আহমেদ খান, নগাঁৱৰ নীৰজ বৰা আৰু চিৰঞ্জীৱ বৰা, ধিঙৰ সুৰঞ্জন দেৱনাথ আৰু ডেৰাডুনৰ বন্যপ্ৰাণী গৱেষণা প্ৰতিষ্ঠানৰ ওমৰ চৈয়দ আৰু মুজাহিদ আহমেদৰ লগতে অষ্টম শ্ৰেণীৰ ছাত্ৰী এছ এছ ইলাক্কিয়া গননাকাৰী হিচাবে অংশগ্ৰহণ কৰে।

গননাৰ শেষত বিয়লিলৈ সকলো গননাকাৰীয়ে একেলগে দিনটোৰ গননাৰ তথ্য সমূহ লৈ এক আলোচনাত মিলিত হয়। সকলো তথ্য সম্পাদনা কৰাৰ পাছতেই গননাৰ তথ্য পৰৱৰ্তী সময়ত প্ৰকাশ পাব বুলি বিভাগীয় সূত্ৰত প্ৰকাশ।