যোৱা ১০ বছৰত সকলো চিনেমাই ফ্লপ : এইবাৰ ৩৫০ কোটি টকাৰ বাজেটৰ চিনেমাত অভিনয় কৰিব অৰ্জুন কাপুৰে

বলীউডত এনে কিছুমান অভিনেতা আছে যাৰ কেৰিয়াৰ ফ্লপ চিনেমাৰে আৰম্ভ হৈছে যদিও পিছলৈ তেওঁৰ চিনেমা ছুপাৰহিট হৈছে। আন একাংশ অভিনেতা আছে যি কেৰিয়াৰৰ আৰম্ভণিতে ছুপাৰহিট চিনেমা কৰিবলৈ সক্ষম হৈছে যদিও পিছত ধাৰাবাহিকভাবে চিনেমা ফ্লপ হৈছে। তেনে এজন অভিনেতা হৈছে অৰ্জুন কাপুৰ।

খবৰ অনুসৰি, শেহতীয়াকৈ ৩৫০ কোটি টকাৰ এখন ডাঙৰ বাজেটৰ চিনেমাত অভিনয় কৰিছে অৰ্জুন কাপুৰে।

এই অভিনেতাজনে যোৱা ১০ বছৰত অভিনয় কৰা প্ৰায় ১০খন চিনেমাই ফ্লপ হৈছে।

কিন্তু এইবাৰ তেওঁ ব্লকবাষ্টাৰ ফ্ৰেঞ্চাইজিৰ খলনায়ক হিচাপে পৰ্দালৈ আহিছে।

২০১২ চনত ‘ইছাকজাদে’ শীৰ্ষক ছবিখনৰ দ্বাৰাই বলীউডত অভিষেক ঘটিছিল অৰ্জুন কাপুৰৰ। ইয়াৰ পিছত অৰ্জুন কাপুৰক দেখা গৈছিল ব্লকবাষ্টাৰ ছবি ‘গুণ্ডে’ আৰু ‘২ ষ্টেটছ’ত।

কিন্তু তাৰ পিছত যেন অৰ্জুন কাপুৰৰ কেৰিয়াৰলৈ নামি আহিছিল দুৰ্ঘোৰ অন্ধকাৰ। ইয়াৰ পিছত তেওঁৰ চিনেমাবোৰ ইখনৰ পিছত সিখনকৈ ফ্লপ হ’বলৈ ধৰিলে।

বলীউড হাংগামাৰ তথ্য অনুসৰি ২০১৪ চনৰ পিছত অৰ্জুন কাপুৰৰ কোনো ব্যৱসায়িকভাৱে সফল চিনেমা নাই।

এই সময়ছোৱাত অৰ্জুন কাপুৰৰ কিছুমান ছবি—‘হাফ গাৰ্লফ্ৰেণ্ড’ আৰু ‘মুবাৰকন’—এ মোটামোটি ব্যৱসায় কৰিছিল। কিন্তু ‘এক ভিলেইন ৰিটার্নছ’, ‘দ্য লেডী কিলাৰ’, ‘সন্দীপ ঔৰ পিংকি ফাৰাৰ’, ‘পানীপথ’, ‘ইণ্ডিয়াছ মষ্ট ৱাণ্টেড’, ‘নমস্তে ইংলেণ্ড’, ‘ফাইণ্ডিং ফেনী’, ‘টেভাৰ’ আৰু ‘ঔৰংজেব’ আদি চিনেমাই ব্যৱসায়িক দিশত সফল হ’ব নোৱাৰিলে।

ধাৰাবাহিকভাবে বিফলতা অৰ্জনৰ পিছত এইবাৰ পুনৰ ডাঙৰ বাজেটত কাম কৰিবলৈ সাহ কৰিছে অৰ্জুন কাপুৰে। স্বাভাৱিকতেই এতিয়া প্ৰশ্ন উত্থাপন হৈছে – এইবাৰো অৰ্জুন কাপুৰক ভৰসা কৰি কোটি কোটি টকাৰ লোকচানৰ সন্মুখীন হ’ব নেকি চিনেমাৰ প্ৰযোজকগৰাকী!